طبی آلات کی رجسٹریشن 120 دن میں مکمل ہوگی، مصطفی کمال

وزیراعظم نے آبادی سے متعلق ایک اعلیٰ سطح کی کمیٹی بنائی ہے، ایک انٹیگریٹڈ سسٹم لانچ کرنے جا رہے ہیں، وزیر صحت

پیر 21 جولائی 2025 23:00

طبی آلات کی رجسٹریشن 120 دن میں مکمل ہوگی، مصطفی کمال

اسلام آباد (اُردو پوائنٹ اخبارتازہ ترین - این این آئی۔ 21 جولائی2025ء)وفاقی وزیر صحت مصطفی کمال نے کہا ہے کہ میڈیکل آلات کی رجسٹریشن کا عمل تین تین سال نہیں ہوتا تھا، اب طبی آلات کی رجسٹریشن 120 دن میں مکمل ہوگی۔طبی آلات کی لائسنسنگ اور رجسٹریشن کے ڈیجیٹل سسٹم کی افتتاحی تقریب اسلام آباد میں منعقد ہوئی، وزیراعظم محمد شہباز شریف بھی تقریب میں شریک تھے۔

اس موقع پر وفاقی وزیر صحت مصطفی کمال نے کہا کہ عوام کیلئے سہولت اور بہتری کے لیے کوشاں ہیں، پاکستان میں میڈیکل آلات کی رجسٹریشن مشکل کام تھا، میڈیکل آلات کی ریگولرائزیشن کیلئے سفارشی کلچر کو ختم کر دیا ہے۔ انھوں نے کہا کہ وزیراعظم بہت قابل ہیں، وزیراعلیٰ رہ چکے ہیں، انہیں بہت کچھ پتہ ہے۔ میڈیکل آلات کی رجسٹریشن کا عمل تین تین سال نہیں ہوتا تھا، اب طبی آلات کی رجسٹریشن 120 دن میں مکمل ہوگی۔

(جاری ہے)

وفاقی وزیر صحت نے کہا کہ وزیراعظم نے آبادی سے متعلق ایک اعلیٰ سطح کی کمیٹی بنائی ہے، ایک انٹیگریٹڈ سسٹم لانچ کرنے جا رہے ہیں تاکہ ہر مریض کو دیکھا جاسکے، پاکستان کی آبادی بڑھنے کی شرح 3.6فیصد ہے۔ مصطفی کمال نے کہا کہ ہم ہر سال نیوزی لینڈ جتنی آبادی کا اضافہ اپنے ملک میں کر رہے ہیں، پاکستان میں سالانہ آبادی نیوزی لینڈ کی کل آبادی جتنی بڑھ رہی ہے، 68 فیصد بیماریاں گندا پانی پینے سے پیدا ہوتی ہیں۔ انہوںنے کہاکہ بچوں کے کینسر کے وارڈ میں جائیں تو دل دہل جاتا ہے، مریض کو مریض بننے سے بچانا چاہتے ہیں، ہمارا نظام اس قسم کا ہے کہ ہم مریض کا اسپتال میں انتظار کر رہے ہوتے ہیں، ہماری کوشش ہے کہ مریض کو مریض بننے سے روکیں۔