چوہدری شجاعت حسین کی زیر صدارت پاکستان مسلم لیگ پنجاب کے تنظیمی امور کے حوالے سے اہم اجلاس

منگل 22 جولائی 2025 19:56

لاہور (اُردو پوائنٹ اخبارتازہ ترین - این این آئی۔ 22 جولائی2025ء) سابق وزیر اعظم و صدر پاکستان مسلم لیگ چوہدری شجاعت حسین کی زیر صدارت پاکستان مسلم لیگ پنجاب کے تنظیمی امور کے حوالے سے ایک اہم اجلاس منعقد ہوا۔ جس میں صوبائی وزیر و جنرل سیکرٹری پنجاب چوہدری شافع حسین، سیکرٹری جنرل پاکستان مسلم لیگ محمد طارق حسن، صوبائی صدر مسلم لیگ پنجاب ملک شمیم، اور رکن مرکزی ورکنگ کمیٹی حافظ عقیل جلیل نے شرکت کی۔

اجلاس میں فیصلہ کیا گیا کہ پاکستان مسلم لیگ پنجاب کی تنظیم کو ڈویژن، ضلع اور تحصیل کی سطح پر منظم کیا جائے گا تاکہ پارٹی کو مزید فعال اور مضبوط بنایا جا سکے۔ اس موقع پر صدر پاکستان مسلم لیگ چوہدری شجاعت حسین نے کہا کہ پاکستان مسلم لیگ خدمت اور رواداری کی سیاست پر یقین رکھتی ہے۔

(جاری ہے)

چوہدری شافع حسین نے کہا کہ چوہدری ظہور الٰہی شہید نے خدمت اور رواداری کی سیاست کی بنیاد رکھی جسے آج تک شجاعت حسین اسی جذبے کے ساتھ نبھا رہے ہیں، جو پاکستان مسلم لیگ کے ہر کارکن کے لیے باعث فخر ہے۔

سیکرٹری جنرل پاکستان مسلم لیگ محمد طارق حسن نے کہا کہ چوہدری شجاعت حسین کی ہدایات کے مطابق پاکستان مسلم لیگ کو منظم اور فعال بنانے کے لیے میں اپنا بھرپور کردار ادا کرتا رہوں گا۔اجلاس میں پارٹی کی تنظیمی بہتری کے لیے مشاورت جاری رکھنے اور آئندہ ہفتوں میں مزید اہم فیصلے متوقع ہونے کا عندیہ بھی دیا گیا۔