سابق گورنر پنجاب میاں محمد اظہر طویل علالت کے بعد انتقال کرگئے

منگل 22 جولائی 2025 23:10

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) سینئر سیاستدان وسابق گورنر پنجاب اور رکن قومی اسمبلی میاں محمد اظہر طویل علالت کے بعد لاہور میں انتقال کرگئے۔فیملی ذرائع کے مطابق میاں محمد اظہر طویل عرصے سے بیمار اورمقامی ہسپتال میں زیر علاج تھے۔میاں محمد اظہرپاکستان تحریک انصاف کے رہنما حماد اظہر کے والدتھے جو2024کے الیکشن میں قومی اسمبلی کے حلقہ این اے 129سے پی ٹی آئی کے حمایت یافتہ امیدوار تھے اور آزاد حیثیت میں رکن منتخب ہوکر سنی اتحاد کونسل میں شامل ہوگئے تھے۔

ان کا شمار پاکستان کے سینئر سیاستدانوں میں ہوتا تھا۔ گزشتہ کئی عرصے سے وہ پاکستان تحریک انصاف کے حامی تھے اور آخری بار ہونے والے عام انتخابات میں این اے 129سے رکن قومی اسمبلی منتخب بھی ہوئے تھے۔

(جاری ہے)

کارکن کی حیثیت سے اپنا سیاسی کیرئیر شروع کرنے والے زیرک سیاستدان میاں محمد اظہر1987 سے 1991 تک لاہور کے میئر رہے جبکہ 1990سے 1992تک گورنر پنجاب کے عہدے پر فائز رہے۔ان کی عملی سیاسی زندگی کی ابتدائی وابستگی مسلم لیگ ن کے ساتھ تھی اور بعد میں نوازشریف کی جلا وطنی کے دوران پاکستان مسلم لیگ ق میں شامل ہو گئے۔وزیراعلی پنجاب مریم نواز نے سابق گورنر میاں اظہر کے انتقال پر افسوس، سوگوار خاندان کے ساتھ تعزیت اور ہمدردی کا اظہار کیا ہے۔