Live Updates

ماحولیاتی تبدیلیوں کے اثرات پاکستان اور آزاد جموں وکشمیر پر شدید انداز میں ظاہر ہو رہے ہیں،راجہ سجاد خان ایڈووکیٹ

بدھ 23 جولائی 2025 16:22

مظفرآباد (اُردو پوائنٹ اخبارتازہ ترین - این این آئی۔ 23 جولائی2025ء)راجہ سجاد احمد خان ایڈووکیٹ نے حالیہ سیلابی صورتِ حال،کلاؤڈ برسٹ اور شدید بارشوں سے جانی و مالی نقصان پر گہرے دکھ اور اظہارِ افسوس کیا ہے۔ان خیالات کا اظہار انھوں نے اخبار نویسوں سے گفتگو کرتے ہوئے کیا انھوں نے ملک کے مختلف علاقوں خصوصاً بابوسر ٹاپ،بوبسر،آزاد جموں وکشمیر کے مختلف اضلاع،لوئیر دیر،سوات میں شدید بارشوں،کلاؤڈ برسٹ اور سیلاب کے نتیجے میں قیمتی انسانی جانوں کے ضیاع اور مالی نقصان پر گہرے دکھ اور افسوس کا اظہار کیا ہے۔

انہوں نے کہا کہ بابوسر ٹاپ پر کلاؤڈ برسٹ کے باعث متعدد قیمتی جانوں کے ضائع پر دکھ وافسوس کا اظہار کیا ہے۔انھوں نے کہا کہ متاثرہ خاندانوں کے غم میں پوری قوم برابر کی شریک ہے اور اس کٹھن وقت میں ہم سب کو یکجہتی، ہمدردی اور فوری عملی اقدامات کی ضرورت ہے۔

(جاری ہے)

انہوں نے متاثرہ خاندانوں سے دلی ہمدردی کا اظہار کرتے ہوئے جاں بحق افراد کے درجات کی بلندی اور زخمیوں کی جلد صحتیابی کے لیے دعا کی۔

انہوں نے حکومتِ پاکستان،حکومت آزادکشمیر،صوبائی حکومتوں اور این ڈی ایم اے ودیگر متعلقہ اداروں سے مطالبہ کیا کہ وہ فوری طور پر متاثرہ علاقوں میں ریسکیو اور ریلیف کے مؤثر اقدامات کریں خاص طور پر ان علاقوں میں جہاں کلاؤڈ برسٹ یا لینڈ سلائیڈنگ جیسی ہنگامی صورتحال پیش آئی ہے۔انہوں نے کہا کہ زخمیوں کو فوری طبی امداد بے گھر افراد کو شیلٹر،خوراک اور ضروریاتِ زندگی کی فراہمی کو یقینی بنایا جائے۔

انھوں نے کہا کہ ماحولیاتی تبدیلیوں کے اثرات پاکستان اور آزاد جموں وکشمیر پر شدید انداز میں ظاہر ہو رہے ہیں اور حالیہ بارشیں اور کلاؤڈ برسٹ جیسے واقعات اسی کی کڑی ہیں۔ انہوں نے قدرتی آفات سے نمٹنے کے قومی نظام کو ازسرِ نو فعال مربوط اور جدید خطوط پر استوار کرنے پر زور دیا تا کہ مستقبل میں ایسے سانحات سے بہتر طور پر نمٹا جا سکے۔