آزادجموں وکشمیرکابینہ کی پولیس جوانوں کیلئے مراعات کی منظوری

مظفر آباد (اُردو پوائنٹ اخبارتازہ ترین - اے پی پی۔ 23 جولائی2025ء) آزادجموں وکشمیر کابینہ نے پولیس ملازمین کے رسک الائونس کو 2015 کی بنیادی تنخواہ کےمطابق کرنے، راشن الائونس بڑھانےاوریونیفارم الائونس کوتنخواہ کےساتھ اداکرنےکی منظوری دے دی ہے۔ آزاد کشمیر حکومت کے موسٹ سینئر وزیر کرنل(ر) وقار احمد نور نے وزراء حکومت میاں عبدالوحید ایڈووکیٹ، عبدالماجد خان، چویدری اکبر ابراہیم کے ہمراہ آزاد جموں وکشمیر کابینہ اجلاس کے بعد میڈیا کو بریفنگ دیتے ہوئے کہا ہے کہ کابینہ نے پولیس جوانوں کیلئے رسک الائونس کو 2015 کی بنیادی تنخواہ کے مطابق کرنے، راشن الائونس بڑھانے اور یونیفارم الائونس کو تنخواہ کے ساتھ ادا کرنے کی منظوری دیدی ہے، کابینہ نے پولیس جوانوں کے دیگر حل طلب مسائل کے حل کیلئے کمیٹی تشکیل دیدی ہے، کابینہ نے مون سون کے دوران متاثرین کی فوری امداد کیلئے 80 کروڑ روپے ایس ڈی ایم اے کے ڈسپوزل پر رکھ دیئے ہیں۔

(جاری ہے)

کابینہ اجلاس میں دہشتگردی کے خلاف بہادر مسلح افواج کی خدمات کو خراج تحسین پیش کرنے، آزاد کشمیر میں امن وامان کی صورتحال کو برقرار رکھنے کیلئے پولیس فورس کی خدمات کو خراج تحسین پیش کرنے اور مہاجرین کی نشستوں کے حق پیش کردہ قرارداد کو متفقہ طور پرمنظور کیا گیا اور شہداء کے ایصال ثواب کیلئے فاتحہ خوانی کی گئی۔ سینئر وزیر کرنل(ر) وقار احمد نور نے کہا کہ محکمہ پولیس کی بہتری کیلئے پچھلے ادوار کی نسبت موجودہ دور میں زیادہ توجہ دی گئی ہے، حکومت نے آزاد کشمیر میں امن وامان کی صورتحال کو برقرار رکھنے کیلئے محکمہ کی استعداد کار کو بڑھانے کیلئے 04 ارب روپے خرچ کئے۔

لاجسٹک سپورٹ، انفراسٹرکچر کی بہتری اور سی ٹی ڈی قائم کرنے کیلئے فنڈز خرچ کئے گئے۔ پولیس کے نوجوانوں نے مسائل کے حوالے سے مطالبات پیش کئے۔ پولیس کے جوانوں نے گزشتہ دو سالوں کے دوران بڑی جانفشانی سے کام کیا۔ عوامی ایکشن کمیٹی کے لانگ مارچ کے دوران پولیس جوان زخمی ہوئے، دہشتگردی کی لہر سے نمٹنے کے دوران دو جوان شہید ہوئے، سی ٹی ڈی پولیس کی بروقت کارروائی سے آزاد کشمیر کو بڑی تباہی سے بچایا اور قربانی دے کر لوگوں کو محفوظ بنایا، پولیس کے جوانوں کے مسائل کا ادراک ہے، راشن الائونس، یونیفارم الائونس اور رسک الائونس اہم مسئلہ تھا جس کو حکومت نے ایڈریس کر لیا ہے، باقی مسائل کے حل کیلئے کمیٹی قائم کردی گئی ہے جن کی سفارشات کی روشنی میں حکومت حل طلب مسائل بھی حل کرے گی۔

آزاد کشمیر میں مون سون کے دوران ایس ڈی ایم اے الرٹ ہے اور مثالی کام کر رہا ہے،متاثرین کی فوری امداد کیلئے ضروری امدادی سامان لیا گیا ہے، پٹھیالی میں 150 لوگوں، 81 موٹر سائیکل اور 18 گاڑیاں ریسکیو کی گئیں۔ آزاد پتن میں سڑک کی بندش کے بعد محکمہ شاہرات اور ایس ڈی ایم اے نے 300 لوگوں کو ریسکیو کیا۔ عام آدمی کو فائدہ پہنچانے کیلئے تمام ادارے 24/7 الرٹ ہیں۔

کلائوڈ برسٹ کے خطرات کے پیش نظر نالوں اور دریاؤں کے آس پاس آبادیوں کو متبادل جگہ منتقل کر رہے ہیں اور فلڈ کی صورت میں عوام کو فوری آگاہی فراہم کرنے کیلئے ریسکیو اداروں کا فیلڈ عملہ دریاؤں کے بہائو کی نگرانی پر مامور کر دیا گیا ہے، حکومت نے80 کروڑ روپے ایس ڈی ایم اے کو متاثرین کی فوری امداد کیلئے فراہم کر دیئے ہیں۔ 05 بوٹس ایمرجنسی ریسکیو کیلئےموجود ہیں۔

ہنگامی صورتحال میں ریسکیو کیلئے ڈرون حاصل کرنے پر کام کر رہے ہیں۔ نالوں اور دریاؤں کے آس پاس آبادیوں کو منتقل کرنے کیلئے نوٹسز جاری کروا دئے ہیں، خلاف ورزی کی صورت میں انتظامیہ لوگوں کو منتقل کرے گی۔ اس موقع پر وزیرخزانہ عبدالماجد خان نےکہا کہ مون سون کے دوران ہونے والے نقصانات کے فوری معاوضہ جات ادا کرنے کیلئے محکمہ مالیات ایس ڈی ایم اے اور انتظامیہ کے ساتھ مل کر فوری طور پر فنڈز فراہم کرے گی، کابینہ اجلاس میں مہاجرین کی نشستوں کے حق میں قرارداد منظور کی گئی ہے۔ایک سوال کے جواب میں وزیر قانون نے کہا کہ عدلیہ با اختیار ہے اور عوام کو انصاف فراہم کرنے کیلئے اپنا کردار ادا کر رہی ہے۔