مذہبی سفارتکاری پروگرام کے تحت مشیر اطلاعات خیبرپختونخوا بیرسٹر ڈاکٹرسیف کی سربراہی میں 12رکنی وفد چین روانہ

بدھ 23 جولائی 2025 23:31

پشاور (اُردو پوائنٹ اخبارتازہ ترین - اے پی پی۔ 23 جولائی2025ء) مذہبی سفارتکاری پروگرام کے تحت مشیر اطلاعات خیبرپختونخوا بیرسٹر ڈاکٹرسیف کی سربراہی میں 12رکنی وفد چین روانہ ہو گیا، وفد کے دیگر اراکین میں وزیر مذہبی امور عدنان قادری، وزیر سوشل ویلفیئر سید قاسم علی شاہ بھی شامل ہیں۔ان ممبران کے علاوہ وفد میں سکندر حیات شیرپاؤ، ڈاکٹر ضیا الحق، مولانا زبیر اشرف عثمانی، مولانا انور شاہ، مولانا عبدالقدوس محمدی، مولانا اسامہ اجمل، مولانا محمد احمد، سید شاہ فیصل، حاجی محمد ابرار، اسرار مدنی اور دیگر شامل ہیں۔

بیرسٹر ڈاکٹر سیف نے اس حوالے سے کہا ہے کہ چینی وزارت خارجہ کی دعوت پر IRCRA کے مذہبی سفارتکاری پروگرام کے تحت چین کا دورہ کررہے ہیں، اس پروگرام کا مقصد چین اور پاکستان سمیت مسلم دنیا کیساتھ سماجی، مذہبی اور ثقافتی تعلقات کو مضبوط کرنا، باہمی مکالمے کا فروغ، خطے میں علاقائی تعلقات کا فروغ ہے۔

(جاری ہے)

صوبائی مشیر اطلاعات نے کہا کہ یہ پروگرام اپنی کامیابی کی وجہ سے دنیا بھر میں ایک خاص شناخت کا حامل ہوگیا ہے، اس سال وفد سیاسی اور مذہبی رہنماؤں کے مشترکہ گروہ کے حساب سے تشکیل دیا گیا، جو کہ سنکیانگ میں ارومچی ، کاشغر ، سمیت بیجنگ کا دورہ کریگا۔

انہوں نے کہا کہ وفد چینی وزارت خارجہ کیساتھ ساتھ کمیونسٹ پارٹی آف چائنہ کی مرکزی قیادت سمیت مسلم رہنماؤں، تعلیمی اداروں اور اہم مراکز کا دورہ بھی کریگا، روانگی سے قبل چینی سفارتکار اور منسٹر کونسلر مسٹر شو نے بیرسٹر سیف اور وفد سے ملاقات کی، اس موقع پر انہوں نے کہا کہ سنکیانگ تیزی سے ترقی کرتا چینی صوبہ ہے۔بیرسٹر ڈاکٹر سیف نے کہا کہ اس دورے کے مثبت اثرات پڑیں گے اور پاکستان اور چین کے تعلقات مزید مضبوط ہونگے، یاد رہے کہ بیرسٹر سیف سمیت وفد نے چینی حکام کا شکریہ ادا کیا اور اس دورے کو ایک اہم سنگ میل قرار دیا۔ یاد رہے کہ مذہبی سفارتکاری پروگرام کے تحت مشیر اطلاعات خیبرپختونخوا بیرسٹر ڈاکٹرسیف کی سربراہی میں 12رکنی وفد چین کے دورہ پر گیا ہے ۔