محسن نقوی کی بنگلہ دیش کے امپائرز کو پاکستان میں تربیت دینے کی پیشکش

چیئرمین پی سی بی اور بنگلہ دیشی مشیر کھیل آصف محمود کا ویمن کرکٹ ڈیولپمنٹ پروگرامز کیلئے اشتراک بڑھانے، کھیلوں کے فروغ کیلئے دونوں ملکوں کے درمیان معاہدہ کرنے پر بھی اتفاق

ذیشان مہتاب جمعرات 24 جولائی 2025 11:56

محسن نقوی کی بنگلہ دیش کے امپائرز کو پاکستان میں تربیت دینے کی پیشکش

ڈھاکا (اردو پوائنٹ تازہ ترین اخبار ۔ 24 جولائی 2025ء ) چیئرمین پاکستان کرکٹ بورڈ (پی سی بی) محسن نقوی نے ڈھاکا میں بنگلہ دیش کے مشیر برائے امور نوجوانان اور کھیل آصف محمود سے ملاقات کی، اس دوران دوطرفہ امور اور کرکٹ کے فروغ سے متعلق تعاون پر اتفاق کیا گیا، محسن نقوی نے بنگلہ دیش کے امپائرز کو پاکستان میں ٹریننگ کی پیشکش کی۔

ڈان نیوز کے مطابق محسن نقوی اور آصف محمود نے ملاقات میں ویمن کرکٹ ڈیولپمنٹ پروگرامز کے لیے اشتراک کار بڑھانے پر بات چیت بھی کی، اس دوران یہ اتفاق بھی کیا گیا کہ کھیلوں کے فروغ کے لیے پی سی بی اور بنگلہ دیش کرکٹ بورڈ (بی سی بی) میں معاہدہ کیا جائے گا۔

محسن نقوی نے شناختی دستاویزات کو فول پروف بنانے اور نیشنل ڈیٹابیس اینڈرجسٹریشن اتھارٹی (نادرا) کے سیکیورٹی نظام سے آگاہ کیا۔

(جاری ہے)

بنگلہ دیشی مشیر کھیل آصف محمود نے نادرا کے نظام میں گہری دلچسپی کااظہار کیا۔

محسن نقوی نے بنگلہ دیش کے وفد کو نادرا کے دورے کی دعوت دی، وفد جلد پاکستان آئے گا اور نادرا کا دورہ کرے گا۔

ملاقات میں امور نوجوانان اور کھیلوں کے سیکریٹری محمد محبوب‌ العالم، لوکل گورنمنٹ ڈویژن کے سیکریٹری محمد رضاؤل مقصود جہدی، پاکستان ایمبیسی ڈھاکا کے ناظم الامور محمد واسع، قونصلر کامران ڈھانگل، اور وزارت کے سینئر حکام موجود تھے۔