بیٹر بین ڈنک کا ورلڈ چیمپئن شپ آف لیجنڈز 2025ء میں پاک بھارت ٹاکرے کی منسوخی پر خیالات کا اظہار

جمعرات 24 جولائی 2025 19:37

لندن(اُردو پوائنٹ اخبارتازہ ترین - این این آئی۔ 24 جولائی2025ء)سابق آسٹریلوی وکٹ کیپر بیٹر بین ڈنک نے ورلڈ چیمپئن شپ آف لیجنڈز 2025ء میں پاک بھارت ٹاکرے کی منسوخی پر خیالات کا اظہار کیا ہے۔بین ڈنک نے میڈیا کانفرنس میں امید کا اظہار کرتے ہوئے کہا کہ کرکٹ کی وجہ سے سرحدوں سے بالا تر ہو کر شائقین متحد ہوتے رہیں گے۔اٴْنہوں نے کہا کہ کرکٹ کے مداح کے طور پر میں ہر طرح کی کرکٹ سے محبت کرتا ہوں، جتنا زیادہ کرکٹ کھیلوں میرے لیے اتنا ہی اچھا ہے۔

سابق آسٹریلوی کرکٹر نے کہا کہ ہر کسی کو یہ حق حاصل ہے کہ وہ جس کی چاہے حمایت کرے اور میں ہر ایک کے نقطہ نظر کا احترام کرتا ہوں۔اٴْنہوں نے پاکستان چیمپئنز اسکواڈ کی مجموعی طاقت پر بھی روشنی ڈالی اور خاص طور پر ایک ایسے کھلاڑی کا انتخاب کیا جو ٹورنامنٹ میں آسٹریلیا کا سامنا کرنے پر حقیقی خطرہ بن سکتا ہے۔

(جاری ہے)

بین ڈنک نے کہا کہ یہ ایک لیجنڈز ٹورنامنٹ ہے اور مجھے نہیں لگتا کہ کسی بھی ٹیم میں ایک بھی کھلاڑی ایسا ہے جو اپنے طور پر چیمپئن نہ ہو۔

انہوں نے کہا کہ میری خوش قسمتی ہے کہ میں نے محمد حفیظ کے ساتھ لاہور قلندرز میں وقت گزارا، ہم نے باہمی احترام کی بنیاد پر ایک بہترین رشتہ بنایا۔سابق آسٹریلوی کرکٹر نے کہا کہ محمد حفیظ نے پہلے میچ میں سب سے زیادہ اسکور کیا اور یقیناً ابھی ان سے ہمیں تھوڑا ڈر لگ رہا ہے۔واضح رہے کہ ورلڈ چیمپئنز شپ آف لیجنڈز ( ڈبلیو سی ایل) میں ہونے والا پاک بھارت ٹاکرا منسوخ کر دیا گیا تھا۔