نادرا ریجنل ہیڈ آفس کوئٹہ میں منعقدہ فیس بک لائیو ای کچہری کا انعقاد، ڈائریکٹر جنرل نادرا نے شہریوں کے مسائل سنے

جمعرات 24 جولائی 2025 22:40

کوئٹہ (اُردو پوائنٹ اخبارتازہ ترین - اے پی پی۔ 24 جولائی2025ء) نادرا ریجنل ہیڈ آفس کوئٹہ میں منعقدہ فیس بک لائیو ای کچہری میں ڈائریکٹر جنرل نادرا بلوچستان نے شہریوں کے مسائل سنے اور ان کے فوری حل کے احکامات جاری کئے ۔آن لائن سیشن کا مقصد عوامی رابطہ بہتر بنانا، شکایات کا بروقت ازالہ اور شفافیت کو فروغ دینا تھا، جس میں نمایاں کامیابی حاصل ہوئی۔

ڈی جی نادرا کوئٹہ وزیراعظم پاکستان کی خصوصی ہدایات کے تحت نادرا ریجنل ہیڈ آفس کوئٹہ کی جانب سے منعقدہ فیس بک لائیو ای کچہری میں ڈائریکٹر جنرل نادرا بلوچستان نوید جان صاحبزادہ نے شہریوں کے مسائل نہ صرف سنے بلکہ موقع پر ہی ان کے فوری حل کے احکامات بھی جاری کیے۔ ای کچہری میں عوام کی بڑی تعداد نے شرکت کی، درجنوں شہریوں نے کالز اور میسجز کے ذریعے اپنے مسائل براہِ راست بیان کیے ۔

(جاری ہے)

ای کچہری کے دوران شناختی کارڈ میں درستگی، نئے شناختی کارڈ کے اجرا، فیملی رجسٹریشن سرٹیفکیٹ، نادرا عملے سے متعلق شکایات اور دیگر اہم مسائل کو شہریوں نے ڈائریکٹر جنرل کے سامنے رکھا، جس پر نوید جان صاحبزادہ نے موقع پر ہی متعلقہ افسران کو ایکشن لینے کی ہدایت دی ۔نادرا حکام کے مطابق اس آن لائن سیشن کا مقصد عوامی رابطہ بہتر بنانا، شکایات کا بروقت ازالہ اور شفافیت کو فروغ دینا تھا، جس میں نمایاں کامیابی حاصل ہوئی۔

ای کچہری کے اختتام پر شہریوں نے خوشی اور اطمینان کا اظہار کرتے ہوئے کہا کہ اس طرح کے اقدامات عوام کی آواز سننے اور حل تلاش کرنے کی بہترین مثال ہیں۔ ڈائریکٹر جنرل نادرا نے عوام کا شکریہ ادا کرتے ہوئے یقین دہانی کرائی کہ نادرا بلوچستان اپنی خدمات کو مزید بہتر بنانے کے لیے اس طرح کے براہِ راست رابطوں کا سلسلہ مستقبل میں بھی جاری رکھے گا۔