پاکستان اور امریکہ کے دفاعی تعلقات کے فروغ پر جنرل مائیکل کوریلا کو نشانِ امتیاز (ملٹری) سے نوازا گیا

ہفتہ 26 جولائی 2025 20:30

راولپنڈی (اُردو پوائنٹ اخبارتازہ ترین - اے پی پی۔ 26 جولائی2025ء) حکومت پاکستان نے امریکہ کی سینٹرل کمانڈ (USCENTCOM) کے کمانڈر جنرل مائیکل ای کوریلا کو پاکستان اور امریکہ کے پائیدار فوجی تعاون کے فروغ میں ان کی مثالی خدمات اور اہم کردار کے اعتراف میں نشان امتیاز (ملٹری) کے باوقار ایوارڈ سے نوازا ہے۔پاک فوج کے شعبہ تعلقات عامہ (آئی ایس پی آر) کی جانب سے ہفتہ کو جاری پریس ریلیز کے مطابق ایوان صدر میں منعقدہ تقریب میں صدر مملکت آصف علی زرداری نے جنرل کوریلا کی علاقائی سلامتی کے لیے شاندار خدمات اور دونوں ممالک کے درمیان سٹریٹجک دفاعی تعلقات کو مضبوط بنانے کیلئے ان کی کاوشوں کا اعتراف کرتے ہوئے یہ اعزاز عطا کیا۔

جنرل کوریلا کی بصیرت انگیز قیادت باہمی افہام و تفہیم کو فروغ دینے، دفاعی تعاون کو بڑھانے اور پاکستان کی مسلح افواج اوریو ایس اینٹ کام کے درمیان انسداد دہشت گردی تعاون کو گہرا کرنے میں اہم کردار ادا کر رہی ہے۔

(جاری ہے)

ان کی مسلسل مصروفیت خطے میں امن اور استحکام کے فروغ میں پاکستان کے مرکزی کردار کے لیے گہرے احترام کی عکاسی کرتی ہے۔نشان امتیاز (ملٹری) کے ممتاز اعزاز سے نوازا جانا جنرل کوریلا کی غیر متزلزل حمایت کے لیے پاکستان کی جانب سے ان کی وسیع کاوشوں کی عکاسی کرتا ہے اور دوطرفہ فوجی شراکت داری کی وسعت کی تصدیق بھی کرتا ہے۔

اپنے دورے کے دوران جنرل کوریلا نے صدر مملکت اور فیلڈ مارشل سید عاصم منیر سمیت سینئر پاکستانی سول اور فوجی قیادت سے تفصیلی ملاقاتیں کیں۔ ملاقاتوں کے دوران علاقائی سلامتی، ملٹری ٹو ملٹری روابط کے فروغ ، دہشت گردی اور ابھرتے ہوئے بین الاقوامی خطرات سے نمٹنے کے لیے مشترکہ کوششوں پر تبادلہ خیال کیا گیا۔ جنرل مائیکل ای کوریلا کو ایوارڈ سے نوازنے کا یہ اعلیٰ سطحی اعتراف پاکستان اور امریکہ کے درمیان پائیدار تزویراتی تعلقات کی عکاسی کرتا ہے اور علاقائی امن، سلامتی اور طویل مدتی دفاعی تعاون کے لیے دونوں ممالک کے مشترکہ عزم کا اعادہ کرتا ہے۔قبل ازیں ایوان صدر پہنچنے پر جنرل کوریلا کو مسلح افواج کی جانب سے گارڈ آف آنر پیش کیا گیا۔