جامشورو میں ٹریفک حادثہ: کوچ اور ٹرک میں تصادم، 2 افراد جاں بحق، 10 زخمی

اتوار 27 جولائی 2025 14:20

جامشورو(اُردو پوائنٹ اخبارتازہ ترین - این این آئی۔ 27 جولائی2025ء)ایم نائن موٹر وے پر نوری آباد کے قریب مسافر کوچ اور ٹرک کے درمیان خوفناک تصادم کے نتیجے میں دو افراد جاں بحق اور 10 زخمی ہو گئے۔ریسکیو ذرائع کے مطابق جاں بحق افراد میں 45 سالہ ٹرک ڈرائیور محمد رضوان اور 40 سالہ کوچ کلینر محمد ایوب شامل ہیں، جبکہ زخمیوں میں سعیدہ، فاطمہ، اویس، سلیم، عمران، عائشہ، عروج سمیت دیگر افراد شامل ہیں۔

(جاری ہے)

زخمیوں کو ابتدائی طبی امداد کے لیے نوری آباد ٹراما سینٹر منتقل کیا گیا، جبکہ چار شدید زخمیوں کو حالت نازک ہونے پر لیاقت میڈیکل یونیورسٹی (ایل ایم یو)اسپتال جامشورو منتقل کر دیا گیا۔حادثے کے باعث موٹروے پر گاڑیوں کی قطاریں لگ گئیں۔ ریسکیو ٹیموں نے بروقت کارروائی کرتے ہوئے ٹریک کلیئر کردیا۔ عینی شاہدین کے مطابق حادثہ بس ڈرائیور کو نیند کے باعث پیش آیا۔پولیس کے مطابق حادثہ تیز رفتاری کے باعث پیش آیا، جبکہ متاثرہ مسافر کوچ کراچی سے لاڑکانہ جارہی تھی۔ پولیس نے واقعے کی مزید تحقیقات شروع کر دی ہیں۔