ٹی ایس سی کے امتحانات میں نجی بینک کے گارڈ کی بیٹی نے تیسری پوزیشن حاصل

پیر 28 جولائی 2025 19:03

کراچی (اُردو پوائنٹ اخبارتازہ ترین - این این آئی۔ 28 جولائی2025ء)سندھ بورڈ آف ٹیکنیکل ایجوکیشن کراچی کے تحت ٹیکنیکل اسکول سرٹیفکیٹ (ٹی ایس سی)کے امتحانات کے نتائج میں نجی بینک کے گارڈ کی بیٹی نے تیسری پوزیشن حاصل کرلی۔ وجیہہ شاہ نے کمپیوٹر سائنس میں کل نمبر 1350میں سے 1164نمبر حاصل کر کے تیسری پوزیشن کی حقدار قرار پائیں۔ وجیہہ شاہ کے والد نجی بینک میں گارڈ کی نوکری کرتے ہیں۔

پوزیشن ہولڈرز نے لوڈشیڈنگ کو سب سے بڑا مسئلہ قرار دے دیا۔ سندھ بورڈ آف ٹیکنیکل ایجوکیشن کراچی کے تحت ٹیکنیکل اسکول سرٹیفکیٹ سال دوم کے امتحانات کے نتائج میں پوزیشن ہولڈرز کے اعزاز میں تقریب کے موقع پر پوزیشن ہولڈرز کا کہنا تھا کہ کراچی کا سب سے بڑا مسئلہ لوڈ شیڈنگ ہے حکومت کو چاہیے اس پر سنجیدگی سے ایکشن لے۔

(جاری ہے)

پہلی پوزیشن حاصل کرنے والے گلشن ٹیکنیکل ہائی اسکول ملیر کے شعبہ کمپیوٹر سائنس کے طالب علم حافظ محمد شہیر کا کہنا تھا کہ وہ مستقبل میں آرٹیفیشل انٹلیجنس (اے آئی)کی فیلڈ میں جانا چاہتا ہوں۔

میرے والد پرائیوٹ اسکول میں ٹیچر ہیں اس کامیابی کا سہرا والدین اور اساتذہ کی محنت کو جاتا ہے۔ کراچی کا سب سے بڑا مسئلہ لوڈ شیڈنگ ہے اسے ختم ہونا چاہیے۔ گلشن ٹیکنیکل ہائی اسکول ملیر کے شعبہ کمپیوٹر سائنس کے طالب علم محمد شمائخ احمد کا کہنا تھا کہ میں الیکٹریکل انجینئر بننا چاہتا ہوں۔ میں اپنی محنت سے مطمئن ہوں۔ کمپیوٹر فیلڈ میں آنے کا شوق تھا پہلے ہی سے میں نے اے آئی اور گرافکس ڈیزائننگ کے مختصر مدت کے کورس کئے ہوئے ہیں کراچی کا سب سے بڑا مسئلہ لوڈ شیڈنگ ہے حکومت کو اس پر توجہ دینا چاہئے۔

تیسری پوزیشن حاصل کرنے والی ورکرز ماڈل اسکول سائٹ ایریا حیدر آباد کی طالبہ وجیہہ شاہ کا کہنا تھا کہ میرے والدین اور اساتذہ نے میری کامیابی میں اہم کردار ادا کیا ہے میرے والد جعفر شاہ نجی بینک میں گارڈ کا کام کرتے ہیں ان کا کہنا تھا کہ تم نے جنتا پڑھنا ہے پڑھو اور جس فیلڈ میں جانا ہے جا۔ ایک سوال کے جواب میں وجیہہ شاہ کا کہنا تھا کہ حیدر آباد اور کراچی میں بہت سے مسائل ہیں گیس، بجلی، پانی اور ٹریفک کے مسائل سنگین صورتحال اختیار کرچکے ہیں۔ ہمارے امتحانی مرکز میں کوئی نقل نہیں ہوئی امتحانی عمل بڑے پر سکون ماحول میں ہوا۔