ہارورڈ یونیورسٹی نے بھی ٹرمپ انتظامیہ کے سامنے ہتھیار ڈال دئیے

ٹرمپ سے تنازع ختم کرنے کے لیے 500 ملین ڈالر وقف کرنے کا اعلان

منگل 29 جولائی 2025 15:55

بگوٹا(اُردو پوائنٹ اخبارتازہ ترین - این این آئی۔ 29 جولائی2025ء)کولمبیا یونیورسٹی کے بعد ہارورڈ یونیورسٹی نے بھی ٹرمپ انتظامیہ کے سامنے ہتھیار ڈال دئیے۔غیر ملکی خبر رساں ادارے کے مطابق ہارورڈ یونیورسٹی وائٹ ہائوس سے تنازع ختم کرنے کے لیے 500 ملین ڈالر وقف کرنے کا اعلان کر دیا۔ہارورڈ یونیورسٹی اس بات پر متفق ہوگئی کہ وہ ٹرمپ انتظامیہ کو رقم کی ادائیگی کرے، تاہم مالی شرائط پر مذاکرات جاری ہیں۔

(جاری ہے)

اپریل میں محکمہ تعلیم نے کہا تھا کہ پالیسیاں نہ بدلنے کی وجہ سے وہ ہارورڈ یونیورسٹی کی سوا دو ارب ڈالر کی امداد بند کر رہا ہے۔ٹرمپ انتظامیہ نے اعلان کیا تھا کہ کولمبیا یونیورسٹی کی طرح حکومتی فنڈنگ لینے کے لیے ہارورڈ اور دیگر یونیورسٹیوں کو بھی جرمانہ دینا ہو گا۔واضح رہے کہ گزشتہ دنوں امریکا کی کولمبیا یونیورسٹی نے قانونی جنگ ختم کرنے اور وفاقی فنڈنگ پر ڈونلڈ ٹرمپ انتظامیہ سے ڈیل کر لی تھی۔غیرملکی میڈیا کے مطابق نیویارک کی کولمبیا یونیورسٹی کا کہنا تھا کہ کئی وفاقی ایجنسیوں کی تحقیقات کا معاملہ حل کرنے کے لیے امریکی حکومت کے ساتھ معاہدہ کیا ہے۔معاہدے کے مطابق 3 سال کے دوران وفاقی حکومت کو 20 کروڑ ڈالر ادا کیے جائیں گے۔