چیف ایگزیکٹو لیسکو کی زیر صدارت ای۔کچہری ،شکایات کے ازالے کے لئے احکامات جاری کئے

منگل 29 جولائی 2025 17:09

لاہور (اُردو پوائنٹ اخبارتازہ ترین - اے پی پی۔ 29 جولائی2025ء) چیف ایگزیکٹو لیسکو انجینئر محمد رمضان بٹ کی زیر صدارت ای۔کچہری کا انعقاد کیا گیا۔ ای۔کچہری لیسکو کے آفیشل فیس بک پیج پر براہِ راست منعقد ہوئی جس میں صارفین کی شکایات سنی گئیں اور شکایات کے فوری ازالے کے لئے موقع پر ہی احکامات جاری کئے گئے۔ ای کچہری میں تمام سرکلز کے صارفین نے شرکت کی اور اپنے مسائل بیان کیے، جس پر سی۔

ای۔او لیسکو نے متعلقہ افسران کو فی الفور ہدایات جاری کی گئیں کہ تمام شکایات 24 گھنٹے کے اندر حل کی جائیں۔ انہوں نے کہا کہ صارفین کو ان کی ریڈنگ کے مطابق بل جاری ہوں اور شکایات کے ازالے کو مکمل طور پر یقینی بنایا جائے۔ انہوں نے صارفین سے بھی درخواست کی کہ بجلی کی بلا تعطل سپلائی کو یقینی بنانے کے لئے اپنے بجلی بلوں کی بروقت ادائیگی کریں۔

(جاری ہے)

چیف ایگزیکٹو لیسکو نے کہا کہ ای۔کچہری کا مقصد صارفین کے مسائل کو فوری، شفاف اور براہِ راست انداز میں حل کرنا ہے اور یہ حکومت پاکستان کے وژن کا عملی اظہار ہے۔ اس موقع پر تمام فنکشنل ہیڈز ،سی ایس ڈی عباس علی، ڈی جی ایمپیمنٹیشن رائے محمد اصغر، ڈائریکٹر ایچ آر ضمیر حسین کلاچی سمیت دیگر موجود تھے جبکہ تمام سرکلز کے ایس ایز نے بھی فیس بک لنک کے ذریعے ای کچہری میں شرکت کی۔ واضح رہے کہ لیسکو چیف اپنی ٹیم کے ہمراہ ہر ماہ فیس بک پیج کے ذریعے عوام کی شکایات وصول کرتے ہیں جن کے فوری ازالے کو ہر ممکن طور پر یقینی بنایا جاتا ہے۔