صدرٹرمپ کا خالصتان تحریک کے رہنما گرپتونت سنگھ کے نام خط ، بھارت کے لئے ایک اوردھچکہ

اسلام آباد (اُردو پوائنٹ اخبارتازہ ترین - اے پی پی۔ 29 جولائی2025ء) امریکی صدر ڈونلڈٹرمپ نے مودی حکومت کو سفارتی محاذ پر ایک اور جھٹکا دیتے ہوئے خالصتان نواز تنظیم ''سکھز فار جسٹس ''کے رہنما گروپتونت سنگھ پنوں کو خط لکھ دیا جس میں امریکی شہریوں کے حقوق اور سلامتی کے لیے لڑائی جاری رکھنے کے عزم کا اعادہ کیا گیا ہے۔ کشمیرمیڈیاسروس کے مطابق بھارت سے آزادی کے لیے سرگرم خالصتان نوازتنظیم ''سکھز فار جسٹس ''کے رہنما گرپتونت سنگھ پنوں نے امریکی صدر ٹرمپ کی جانب سے ارسال کردہ خط اپنی ایکس پوسٹ میں شیئر کیا ہے۔

امریکی صدر ٹرمپ نے خط میں واضح کیا کہ میں اپنے شہریوں، اپنی قوم اور اپنی اقدار کو سب سے پہلے رکھتا ہوں، جب امریکہ محفوظ ہوگا، تبھی دنیا بھی محفوظ ہوگی۔امریکی صدر نے کہا کہ میں اپنے شہریوں کے حقوق اور سلامتی کے لیے لڑنا کبھی نہیں چھوڑوں گا۔

(جاری ہے)

صدر ٹرمپ کا خط ایسے وقت میں سامنے آیا ہے جب 17اگست کو واشنگٹن میں خالصتان تحریک کا ریفرنڈم ہونا ہے۔

ریفرنڈم سے چند ہفتے قبل صدر ٹرمپ کا یہ خط نہ صرف سیاسی بلکہ سفارتی حلقوں میں بھی بڑی اہمیت رکھتا ہے۔ صدر ٹرمپ کے خط میں تجارت، ٹیرف، دفاعی اخراجات اور امریکی اقدار پر مبنی پالیسیوں پر زور دیا گیا ہے۔صدر ٹرمپ نے خط میں مزید لکھا کہ بطور صدر وہ ان اقدار کے تحفظ کے لیے پرعزم ہیں جو ہمیں امریکی بناتی ہیں۔خط میں امریکہ کی خارجہ پالیسی، فوجی تیاری اور عالمی امداد کا بھی ذکرہے۔

امریکی صدر ٹرمپ کے خط نے بین الاقوامی سطح پر نئی بحث چھیڑ دی ہے۔واضح رہے کہ گروپتونت سنگھ پنوں کو بھارتی حکومت2020میں دہشت گرد قرار دے چکی ہے۔امریکی صدرکا یہ خط خالصتان تحریک کے لیے خاص اہمیت اختیار کر گیا، اس خط کو سفارتی سطح پر بھارتی حکومت کیلئے ایک اوردھچکہ قرار دیا جارہا ہے۔واضح رہے کہ بھارت کی جانب سے بین الاقوامی سطح پر خالصتان تحریک کو کچلنے کی تمام کوششیں ناکام ہوچکی ہیں۔

اقوام متحدہ سمیت کئی بین الاقوامی اداروں نے بھارت کے موقف کوتسلیم نہیں کیا۔بھارت کی ناکام سفارتکاری کا بڑا ثبوت امریکی صدر ٹرمپ کا گرو پتونت سنگھ کے نام خط ہے۔ یہ خط بھارت کی سفارتی حکمت عملی کی ناکامی اور خالصتان تحریک کی عالمی بازگشت کا بھی ثبوت ہے۔یاد رہے کہ امریکی صدر اب تک 27بار پاکستان اور بھارت کے درمیان جنگ بندی کا دعویٰ کرکے مودی حکومت کے جھوٹ کو بے نقاب کرچکے ہیں۔