ایف آئی اے نے رواں سال1368انسانی سمگلروں کو گرفتار کرلیا

گرفتار ہونیوالوں میں یونان کشتی حادثات میں ملوث 91انسانی سمگلر بھی شامل

بدھ 30 جولائی 2025 21:10

اسلام آباد (اُردو پوائنٹ اخبارتازہ ترین - این این آئی۔ 30 جولائی2025ء)ایف آئی اے نے رواں مالی سال کے دوران 1368 انسانی اسمگلروں کو گرفتار کرلیا۔ترجمان ایف آئی اے کے مطابق گرفتار ملزمان میں ریڈ بک کے 16انتہائی مطلوب انسانی اسمگلرز بھی شامل ہیں جن میں یونان کشتی حادثات میں ملوث 91انسانی سمگلر بھی شامل ہیں۔ایف آئی اے ترجمان کے مطابق رواں سال کے دوران ایف آئی اے نے انسانی سمگلنگ میں ملوث ملزمان کی 955ملین روپے سے زائد مالیت کی جائیدادیں ضبط کی۔

انسانی اسمگلنگ میں ملوث عناصر کے زیر استعمال 239ملین روپے کے بینک اکانٹس منجمد کیے گئے۔ترجمان ایف آئی اے کے مطابق انٹرپول کے ذریعے انسانی سمگلنگ میں ملوث ملزمان کی گرفتاری کے لئے ریڈ نوٹسز جاری کیے گئے۔ کشتی حادثے میں ملوث ایجنٹوں کی گرفتاری کے لئے تمام تر وسائل کو بروئے کار لایا جارہا ہے۔

(جاری ہے)

ڈی جی ایف آئی اے رفعت مختار راجہ نے کہا کہ معصوم جانوں سے کھیلنے والوں کو انصاف کے کٹہرے میں لایا جائے گا۔

گرفتار انسانی سمگلروں کو قانون کے مطابق سخت سزائیں دلوائی جائیں گی۔ترجمان کے مطابق معاشرے میں عوامی آگاہی اور تعاون کو عملی جامہ پہناتے ہوئے ہم یہ جنگ جیت سکتے ہیں۔ انسانی سمگلنگ کے خلاف مثر حکمت عملی ایف آئی اے کی اولین ترجیح ہے۔ترجمان ایف آئی اے نے کہا کہ عالمی اداروں کے ساتھ مل کر انسانی سمگلنگ کے خاتمے کے لئے تمام تر اقدامات کئے جا رہے ہیں۔