پاکستان کا ریموٹ سینسنگ سیٹلائٹ کامیابی سے خلا میں مقررہ مدار میں داخل

وفاقی وزیر منصوبہ بندی احسن اقبال کی سیٹلائٹ کامیابی سے اپنے مقررہ مدار میں داخل ہونے کی تصدیق، یہ واقعہ نہ صرف تکنیکی کامیابی ہے بلکہ ایسا لمحہ ہے جو ہمارے قومی جذبے کو بلند کرتا ہے اور چین کے ساتھ دوستی کو مزید مضبوط بناتا ہے،احسن اقبال

فیصل علوی جمعہ 1 اگست 2025 12:48

اسلام آباد(اردوپوائنٹ اخبار تازہ ترین۔یکم اگست 2025) پاکستان کا ریموٹ سینسنگ سیٹلائٹ کامیابی سے خلا میں مقررہ مدار میں داخل ہوچکا، پاکستان کا نیا ریموٹ سینسنگ سیٹلائٹ-1 (پی آر ایس ایس-1) کُوائژو-1 اے راکٹ کے ذریعے لانچ کیا گیا، وفاقی وزیر منصوبہ بندی احسن اقبال نے تصدیق کی کہ سیٹلائٹ کامیابی سے اپنے مقررہ مدار میں داخل ہو چکا ہے۔وفاقی وزیر احسن اقبال نے کہا کہ یہ واقعہ نہ صرف ایک تکنیکی کامیابی ہے بلکہ ایک ایسا لمحہ ہے جو ہمارے قومی جذبے کو بلند کرتا ہے اور چین کے ساتھ دوستی کو مزید مضبوط بناتا ہے۔

ترجمان سپارکو نے کہا کہ نیا ریموٹ سینسنگ سیٹلائٹ پاکستان کی خلائی تحقیق میں ایک اہم سنگ میل ہے جو زمین کے مشاہداتی صلاحیتوں میں ملک کی پوزیشن کو مزید مستحکم کرے گا۔

(جاری ہے)

یہ لانچنگ سپارکو، چائنا الیکٹرانکس ٹیکنالوجی گروپ کارپوریشن اور مائیکروسیٹ چین کے باہمی تعاون سے عمل میں آئی ہے۔سپارکو کے مطابق یہ سیٹلائٹ شہری منصوبہ بندی، آفات سے نمٹنے، غذائی تحفظ اور ماحولیاتی تحفظ میں انقلاب برپا کرنے کے لیے امیجنگ کی سہولت فراہم کرے گا، یہ موسمیاتی تبدیلی، پانی کے وسائل کے انتظام، زرعی نقشہ سازی اور جنگلات کے کٹاؤ کی نگرانی میں بھی اہم کردار ادا کرے گا۔

واضح رہے کہ دو روز قبل پاکستان کا جدید ریموٹ سینسنگ سیٹلائٹ پاکستانی وقت کے مطابق صبح 7 سے 8 بجے کے درمیان چین کے شیچانگ سیٹلائٹ لانچ سینٹر سے خلاء میں کامیابی کے ساتھ روانہ ہو گیاتھا۔ پاکستان کے خلائی تحقیقی ادارے سپارکو کے ترجمان کے مطابق نیاریموٹ سینسنگ سیٹلائٹ چین کے ژچانگ سینٹر سے راکٹ کے ذریعے روانہ کیا گیاتھا۔سیٹلائٹ پروگرام سے پاکستان کے زمینی مشاہدے کی صلاحیتوں میں نمایاں اضافہ ہو گا۔

فصلوں کی پیداوار، انفراسٹرکچر اور آبادی کی نگرانی ممکن ہوسکے گی۔چین نے جمعرات کی صبح جنوب مغربی چین کے صوبے سیچوان میں واقع شیچانگ سیٹلائٹ لانچ سینٹر سے کوائژو-1A کیریئر راکٹ کے ذریعے پاکستان کے ریموٹ سینسنگ سیٹلائٹ-01 کو کامیابی کے ساتھ پاکستان کی خلائی تحقیقاتی تنظیم ”سُپارکو“ کے تعاون سے خلا میں مقررہ مدار میں بھیج دیاتھا۔

یہ سیٹلائٹ قومی اراضی کے سروے، آفات کی پیش گوئی اور بچاؤ و امدادی سرگرمیوں جیسی خدمات فراہم کرنے کا کام انجام دے گا۔سیٹلائٹ لانچنگ کی مرکزی تقریب کراچی میں سپارکو کے ہیڈکوارٹر میں منعقد ہوئی جہاں قومی خلائی پالیسی اور ویژن 2047 کے تحت اس تاریخی لمحے کا مشاہدہ کیا گیا۔ سپارکو نے اس منصوبے کو پاکستان کے خلائی پروگرام میں ایک نئے باب کا آغاز قرار دیاتھا۔