رویت ہلال کمیٹی کا ذوالحجہ کا چاند نظر آنے کا اعلان، پاکستان میں عید الاضحیٰ 27 مئی کو ہوگی

ملک کے مختلف حصوں سے چاند کی شرعی شہادتیں موصول ہوئیں، جس کے بعد اتفاقِ رائے سے چاند کی رویت کا فیصلہ کیا گیا

ساجد علی اتوار 17 مئی 2026 21:02

رویت ہلال کمیٹی کا ذوالحجہ کا چاند نظر آنے کا اعلان، پاکستان میں عید ..

کراچی (اُردو پوائنٹ اخبارتازہ ترین۔ 17 مئی2026ء) ملک بھر میں عید الاضحیٰ 27 مئی بروز بدھ منائی جائے گی، مرکزی رویت ہلال کمیٹی نے حتمی اعلان کردیا۔ تفصیلات کے مطابق مرکزی رویت ہلال کمیٹی نے پاکستان میں ذوالحجہ 1447 ہجری کا چاند نظر آنے کا باضابطہ اعلان کر دیا ہے، چیئرمین کمیٹی مولانا عبدالخبیر آزاد نے کراچی میں منعقدہ اجلاس کے بعد پریس کانفرنس کرتے ہوئے بتایا کہ ملک کے مختلف حصوں سے چاند کی شرعی شہادتیں موصول ہوئی ہیں، جس کے بعد اتفاقِ رائے سے چاند کی رویت کا فیصلہ کیا گیا۔

بتایا گیا ہے کہ مرکزی رویت ہلال کمیٹی کا اجلاس محکمہ موسمیات کراچی کے دفتر میں ہوا، جس میں کمیٹی ممبران کے علاوہ محکمہ موسمیات اور سپارکو کے ماہرین بھی شریک تھے، اجلاس میں زونل کمیٹیوں کی جانب سے بھیجی گئی شہادتوں کا شرعی اور تکنیکی بنیادوں پر جائزہ لیا گیا۔

(جاری ہے)

چاند نظر آنے کے اعلان کے بعد اب پاکستان میں یکم ذوالحجہ کل یعنی پیر 18 مئی 2026 کو ہوگی، یومِ عرفہ (9 ذوالحجہ) منگل 26 مئی کو ہوگا، عید الاضحیٰ (10 ذوالحجہ) بدھ 27 مئی 2026 کو ملک بھر میں مذہبی جوش و جذبے کے ساتھ منائی جائے گی۔

مولانا عبدالخبیر آزاد نے اس موقع پر قوم کو عید کی مبارکباد پیش کی اور دعا کی کہ یہ مبارک مہینہ پاکستان کے لیے امن اور خوشحالی کا پیغام لائے، اسلام آباد کے علاوہ ملک کے کئی دیگر مقامات سے چاند کی رویت کی معتبر شہادتیں موصول ہوئی تھیں جن کی بنیاد پر یہ اعلان کیا گیا۔