Live Updates

پی ڈی ایم اے پنجاب نے مون سون بارشوں کے چھٹے اسپیل کا الرٹ جاری کر دیا

جمعہ 1 اگست 2025 23:11

لاہور (اُردو پوائنٹ اخبارتازہ ترین - اے پی پی۔ 01 اگست2025ء) پی ڈی ایم اے پنجاب نے مون سون بارشوں کے چھٹے اسپیل کا الرٹ جاری کر دیا ہے، 5 اگست سے پنجاب کے بیشتر اضلاع میں شدید مون سون بارشوں کی پیشگوئی کی گئی ہے جبکہ بارشوں کے باعث5 اگست سے دریائے چناب اور جہلم میں درمیانے سے اونچے درجے کے سیلاب کا خدشہ ہے۔ترجمان پی ڈی ایم اے پنجاب کے مطابق مون سون بارشوں کے چھٹے اسپیل کیلئے صوبہ بھر کے کمشنرز و ڈپٹی کمشنرز کو الرٹ جاری کر دیا گیا۔

مری، گلیات، اٹک، چکوال، جہلم، منڈی بہائوالدین، گجرات، گوجرانوالہ، حافظ آباد ، لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد، اوکاڑہ ،ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور میں بارشوں کی پیشگوئی ہے۔

(جاری ہے)

ریلیف کمشنر پنجاب نبیل جاوید نے صوبہ بھر کے کمشنرز و ڈپٹی کمشنرز اور متعلقہ انتظامیہ کو الرٹ رہنے کی ہدایات جاری کیں۔ پی ڈی ایم اے پنجاب نے سول ڈیفنس، ریسکیو و متعلقہ اداروں کو پیشگی انتظامات مکمل کرنے کی ہدایات جاری کیں۔ ڈائریکٹر جنرل پی ڈی ایم اے عرفان علی کاٹھیا نے کہاکہ وزیر اعلی پنجاب کی ہدایات کے پیش نظرمتعلقہ محکموں کو الرٹ جاری کر دیا ہے، اگست میں مون سون بارشیں گزشتہ ماہ کی نسبت زیادہ ہونے کی پیشگوئی ہے جبکہ ایمرجنسی کنٹرول رومز میں سٹاف ، ریسکیو 1122 کی ڈیزاسٹر رسپانس ٹیموں کو ہائی الرٹ رکھا جائے، عوام جاری کردہ احتیاطی تدابیر پر عمل کریں۔

شدید بارشوں کے باعث مری و گلیات میں لینڈ سلائیڈنگ اورکچے مکانات مخدوش عمارتوں کو نقصان کا خدشہ ہے۔ لہذا مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں۔ اربن و فلیش فلڈنگ کی صورت میں محفوظ مقامات پر رہیں،گاڑی ہرگز بہتے ہوئے پانی سے کراس نہ کریں۔ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔