پی ڈی ایم اے پنجاب نے 5 اگست سے مون سون بارشوں کے چھٹے اسپیل کا الرٹ جاری کر دیا

لاہور (اُردو پوائنٹ اخبارتازہ ترین۔ یکم اگست 2025ء) پی ڈی ایم اے پنجاب نے مون سون بارشوں کے چھٹے اسپیل کا الرٹ جاری کر دیا۔ 5 اگست سے  پنجاب کے بیشتر اضلاع میں شدید مون سون بارشوں کی پیشگوئی ہے۔ بارشوں کے باعث 5 اگست سے دریائے چناب اور جہلم میں درمیانے سے اونچے درجے کے سیلاب کا خدشہ ہے۔ پی ڈی ایم اے پنجاب نے صوبہ بھر کے کمشنرز و ڈپٹی کمشنرز کو الرٹ جاری کر دیا۔

مری، گلیات، اٹک، چکوال، جہلم، منڈی بہاوالدین، گجرات، گجرانوالہ، حافظ آباد میں بارش کی پیشگوئی ہے۔ لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد، اور اوکاڑہ میں بارش کی پیشگوئی ہے۔ ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور میں بارشوں کی پیشگوئی ہے۔

(جاری ہے)

ریلیف کمشنر پنجاب نبیل جاوید  نے صوبہ بھر کے کمشنرز و ڈپٹی کمشنرز اور متعلقہ انتظامیہ کو الرٹ رہنے کی ہدایات جاری کیں۔ پی ڈی ایم اے پنجاب نے سول ڈیفنس، ریسکیو و متعلقہ اداروں کو پیشگی انتظامات مکمل کرنے کی ہدایات جاری کیں۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ وزیر اعلیٰ پنجاب کی ہدایات کے پیش نظرمتعلقہ محکموں کو الرٹ جاری کر دیا ہے۔

اگست میں مون سون بارشیں گزشتہ ماہ کی نسبت زیادہ ہونے کی پیشگوئی ہے۔ ایمرجنسی کنٹرول رومز میں سٹاف کو الرٹ رکھا جائے۔ ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے۔ عوام جاری کردہ احتیاطی تدابیر پر عمل کریں۔ شدید بارشوں کے باعث مری و گلیات میں لینڈ سلائیڈنگ کا خطرہ ہے۔ بارشوں کے باعث کچے مکانات مخدوش عمارتوں کو نقصان کا خدشہ ہے۔

مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں۔ اربن و فلیش فلڈنگ کی صورت میں محفوظ مقامات پر رہیں گاڑی ہرگز بہتے ہوئے پانی سے کراس نہ کریں۔ ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔ مزید برآں پنجاب ڈیزاسٹر مینجمنٹ اتھارٹی (پی ڈی ایم اے) نے مون سون بارشوں اور سیلابی صورتحال سے متعلق فیکٹ شیٹ جاری کر دی ہے۔

ترجمان پی ڈی ایم اے کے مطابق گزشتہ 24 گھنٹوں کے دوران لیہ، بہاولنگر، بہاولپور، نارووال، بھکر، قصور، لاہور اور سیالکوٹ میں بارشیں ریکارڈ کی گئیں جبکہ آئندہ 24 گھنٹوں کے دوران پنجاب کے بیشتر اضلاع میں مزید بارشوں کی پیش گوئی کی گئی ہے۔ڈی جی پی ڈی ایم اے عرفان علی کاٹھیا نے متعلقہ ضلعی انتظامیہ کو الرٹ رہنے کی ہدایات جاری کرتے ہوئے کہا کہ دریائے چناب (مرالہ)، سندھ (تربیلا، کالا باغ، چشمہ، تونسہ) پر نچلے درجے کا سیلاب ہے۔

دریائے جہلم، راوی، ستلج اور دیگر ندی نالوں میں پانی کا بہاو نارمل ہے۔ نارووال کے بسنتر نالہ میں نچلے درجے کی سیلابی کیفیت ہے۔ پی ڈی ایم اے کے مطابق گزشتہ رات رودکوہی علاقوں میں نچلے سے درمیانے درجے کے سیلابی ریلے گزرے، تاہم پیشگی الرٹ کی بدولت کوئی جانی یا مالی نقصان نہیں ہوا۔ڈیمز کی صورتحال کے مطابق تربیلا ڈیم 88 فیصد اور منگلا ڈیم 58 فیصد بھر چکا ہے۔

بھارتی ڈیمز میں پانی کی سطح 43 فیصد تک پہنچ چکی ہے جبکہ رواں مون سون سیزن کے دوران مختلف حادثات میں 162 افراد جاں بحق، 564 زخمی، 121 مویشی ہلاک اور 214 گھروں کو نقصان پہنچا۔ڈی جی پی ڈی ایم اے کا کہنا ہے کہ وزیراعلی پنجاب کی ہدایت پر متاثرہ خاندانوں کو مالی معاونت فراہم کی جا رہی ہے جبکہ شہریوں کو ہدایت دی گئی ہے کہ موسمِ برسات میں احتیاطی تدابیر اختیار کریں اور بچوں کو برساتی نالوں، نشیبی علاقوں، دریاں اور نہروں میں نہانے سے باز رکھیں۔