لیسکو کو گذشتہ ماہ بجلی چوری کی 5995 شکایات موصول ہوئیں ، 111 بجلی چوروں کو گرفتارکیا گیا

ہفتہ 2 اگست 2025 20:33

لاہور (اُردو پوائنٹ اخبارتازہ ترین - اے پی پی۔ 02 اگست2025ء) لاہور الیکٹرک سپلائی کمپنی (لیسکو ) کو گذشتہ ماہ بجلی چوری کی 5995 شکایات موصول ہوئیں جبکہ 111 بجلی چوروں کو گرفتارکیا گیا۔ ہفتہ کو ترجمان کے مطابق وزیراعظم کی ہدایات اور چیف ایگزیکٹو لیسکو انجینئر محمد رمضان بٹ کی زیرو ٹالرنس پالیسی کے تحت گذشتہ ماہ (لیسکو)نے بجلی چوروں کے خلاف مربوط اور موثر کارروائیاں جاری رکھیں، گذشتہ ماہ بجلی چوری کی مختلف نوعیت کی5995شکایات موصول ہوئیں، جن میں گھریلو 5746،کمرشل 173،زرعی62، صنعتی 14شامل تھیں۔

(جاری ہے)

لیسکو نے 5972افراد کے خلاف ایف آئی آر کے لیے درخواستیں متعلقہ تھانوں میں جمع کروائیں، جن میں سے3643ایف آئی آرز درج ہوئیں اور111بجلی چوروں کو گرفتار کیا گیا۔ یہ موثر کارروائیاں لیسکو کی اینٹی تھیفٹ ٹیموں نے ڈسکوز سپورٹ یونٹ (پولیس اور رینجرز)کے تعاون سے انجام دیں۔ لیسکو کی اینٹی تھیفٹ ٹیموں نے دوران کارروائی بجلی چوروں کو 78,36,654یونٹس چارج کیے جن کی مالیت 3ارب 4کروڑ 92لاکھ 6ہزار7سو 56روپے ہے جبکہ اب تک7کروڑ 9 لاکھ سے زائد کی کامیاب ریکوری بھی کی جا چکی ہے۔چیف ایگزیکٹو لیسکو نے کہا کہ بجلی چوری کے مکمل خاتمے تک کارروائیاں روزانہ کی بنیاد پر جاری رہیں گی اور قانون کی عملداری کو ہر حال میں یقینی بنایا جائے گا۔