وزیراعلی مریم نواز کی ہدایت پر یوم آزادی کو شایان شان طریقے سے منانے کیلئے تقریبات کاآغاز

ہفتہ 2 اگست 2025 20:50

لاہور (اُردو پوائنٹ اخبارتازہ ترین - اے پی پی۔ 02 اگست2025ء) وزیر اعلی پنجاب مریم نواز کی ہدایت پر یوم آزادی کو شایان شان طریقے سے منانے کیلئے تقریبات کاآغاز کر دیا گیاہے،رواں سال جشن آزادی کی تقریبات معرکہ حق میں پاکستان کی فتح کے جذبے سے منائی جا رہی ہیں ۔جشن آزادی کی تقریبات کا عنوان ''حصولِ آزادی سے تحفظِ آزادی تک'' رکھا گیا ہے۔وزیر اعلی مریم نواز کی پنجاب بھر میں جشن آزادی کی تقاریب منعقد کرنے کی ہدایت کے تحت ہر ڈسڑکٹ میں جشن آزادی کی خصوصی سرگرمیوں کا آغاز کر دیاگیا ہے ۔

یکم سے 14اگست تک کی سرگرمیوں کو حتمی شکل پہلے ہی دی جا چکی ہے ۔یوم آزادی کی مرکزی تقریب 14اگست کو حضوری باغ میں ہوگی، وزیر اعلی پرچم کشائی کریں گی۔وزیر اعلی پنجاب مریم نواز شریف 14 اگست کو ایکسپو سینٹر لاہور میں ’’معرکہ حق پارک‘‘، ’’معرکہ حق میوزیم‘‘ اور ’’یادگار معرکہ حق‘‘ کی نقاب کشائی کریں گی۔

(جاری ہے)

صوبہ میں عوام کے تمام طبقات کی بھرپور شرکت کے ساتھ تقریبات منعقد کی جائیں گی، گھروں، دکانوں، بازاروں کو قومی پرچموں اور جھنڈیوں سے سجایا جائے گا-صوبہ بھر میں گھروں پر پاکستانی پرچم لہرانے کی مہم کا آغاز ہو گیا ہے- پنجاب بھر میں سرکاری اور نجی عمارتوں پر جشن آزادی چراغاں شروع ہوگیاہے-جشن آزادی پر خصوصی روڈ شوز ہوں گے،رنگا رنگ اورمتنوع ثقافتوں کے اظہار کے لئے فلوٹ بھی چلائے جائیں گے ۔

9 اگست کو مینار پاکستان پر آتش بازی اور لیزر شو ہوگا -تحصیل اور ڈویژنز کی سطح پر بھی آتش بازی اور لیزر شوز ہوں گے ،10اگست کو وزیراعلی آفس اور دیگر سرکاری دفاتر میں پرچم لہرانے کی تقاریب منعقد ہوں گی 13اگست کو موٹر بائیک ریلی ہو گی۔اس سال جشن آزادی میں نوجوانوں اور بچوں کی خاص طور پر شرکت سے تقاریب ہوں گی، معرکہ حق’’بنیان مرصوص ‘‘اور قومی فخر کی اہمیت اجاگر کی جائے گی۔

یوم آزادی پر بچوں، مشہور شخصیات، قومی ہیروز، کھلاڑیوں اور مختلف شعبوں کی نامور شخصیات کے پیغامات چلائے جائیں گے۔انہوں نے اپنے پیغام میں کہاکہ معرکہ حق نے آزادی اور اس کے جشن کی اہمیت بڑھا دی ہے اور قوم کو سمجھا بھی دی ہے۔انہوں نے کہاکہ سپہ سالار فیلڈ مارشل سید عاصم منیر کی قیادت میں ہماری بہادر مسلح افواج نے تحفظ آزادی کی تاریخ میں سنہری باب کا اضافہ کیا۔قوم نے اپنی بہادر مسلح افواج کے ساتھ مل کر ثابت کیا کہ ہم اپنی آزادی کی حفاظت کرنا جانتے ہیں ۔انہوں نے ماں،بہنوں،بیٹیوں،بیٹوں،بھائیوں اوربزرگوں سے اپیل کی کہ یوم آزادی کی تقریبات میں بھرپور حصہ لیں، دکھا دیں کہ ہم زندہ اور باوقار قوم ہیں ۔