ویمنز کرکٹ ٹیم ورلڈ کپ کی تیاریوں کے سلسلے میں آئرلینڈ پہنچ گئی

اتوار 3 اگست 2025 21:30

ڈبلن (اُردو پوائنٹ اخبارتازہ ترین - این این آئی۔ 03 اگست2025ء)آئرلینڈ میں ہونے والی نٹرنیشنل سیریز میں پاکستان ویمنز کرکٹ ٹیم کے میچز 6، 8 اور 10 اگست کو شیڈول ہیںعالمی کپ کی تیاریوں کے سلسلے میں پاکستان ویمنز کرکٹ ٹیم آئر لینڈ پہنچ گئی جہاں قومی ٹیم کلون ٹرف میں ٹی ٹوئنٹی انٹرنیشنل سیریز میں تین میچز کھیلے گی۔پاکستان ویمنز کرکٹ ٹیم کے میچز 6، 8 اور 10 اگست کو شیڈول ہیں تاہم انٹرنیشنل سیریز کے میچز سے قبل مہمان ٹیم خود کو مقامی کنڈیشنز سے ہم آہنگ کرنے کے لیے بھرپور مشقیں کرے گی۔

پاکستان ویمنز ٹیم پیر کو آرام کرے گی اور منگل سے پریکٹس کا آغاز ہوگا۔قبل ازیں 15 رکنی قومی ویمن اسکواڈ فاطمہ ثنا کی قیادت میں اتوار کو علی الصبح کراچی سے دوحا کے راستے اپنی منزل کی جانب روانہ ہوا، محمد وسیم ہیڈ کوچ کی ذمہ داری ادا کر رہے ہیں۔

(جاری ہے)

آئرلینڈ روانگی سے قبل نیشنل اسٹیڈیم کے حنیف محمد ہائی پرفارمنس سینٹر اور اوول گراؤنڈ پر 4 روزہ حتمی کیمپ میں قومی اسکواڈ کو خصوصی تربیت فراہم کی گئی۔

قبل ازیں قومی ویمن کرکٹرزنے 20 روزہ اسکلز اینڈ فٹنس کیمپ میں شرکت کی تھی۔آئرلینڈ جانے والا 15 رکنی قومی ویمنز اسکواڈ فاطمہ ثنا (کپتان)، عالیہ ریاض، ڈیانا بیگ، ایمان فاطمہ،گل فیروزہ، منیبہ علی، نجیحہ علوی (وکٹ کیپر)، نشرہ سندھو، ناتالیہ پرویز، رمین شمیم، سعدیہ اقبال، شوال ذوالفقار، سدرہ امین، طوبیٰ حسن اور وحیدہ اختر پر مشتمل ہے۔