بالی ووڈ کنگ شاہ رخ خان کو فلم’’ جوان‘‘ میں شاندار اداکاری پر پہلا نیشنل فلم ایوارڈ مل گیا

’’جوان‘‘میں شاہ رخ خان نے’’ڈبل رول‘‘ادا کیا تھا اور فلم میں وہ’’سات مختلف روپ‘‘میں نظر آئے

پیر 4 اگست 2025 10:30

ممبئی (اُردو پوائنٹ اخبارتازہ ترین - این این آئی۔ 04 اگست2025ء)بالی وڈ کے مایہ ناز اداکار شاہ رخ خان نے اپنے تین دہائیوں سے زائد عرصے پر محیط فلمی کیریئر میں ایک اہم سنگ میل عبور کر لیا ہے۔ انہیں فلم جوان میں متاثر کن اداکاری پر بہترین اداکار کا نیشنل فلم ایوارڈ دیا گیا ہے۔بھارتی حکومت کی جانب سے منعقد کیے جانے والی71ویں نیشنل فلم ایوارڈز کے فاتحین کا اعلان یکم اگست 2025 کو کیا گیا، جس میں شاہ رخ خان اور اداکار وکرانت میسی(فلم 12th فیل)کو مشترکہ طور پر بہترین اداکار قرار دیا گیا۔

نیشنل ایوارڈ کے بعد شاہ رخ خان نے اپنے سوشل میڈیا اکانٹس پر ایک ویڈیو پیغام کے ذریعے حکومت ہند، فلمی ٹیم اور مداحوں کا شکریہ ادا کرتے ہوئے کہا، یہ میرے لیے ایک جذباتی لمحہ ہے۔ 33 سال بعد یہ اعزاز ملنا میرے لیے باعثِ فخر اور حوصلہ افزائی ہے۔

(جاری ہے)

شاہ رخ خان، جنہیں دنیا بھر میں کنگ خان کے نام سے جانا جاتا ہے، نے 1992 میں فلم دیوانہ سے اپنے کیریئر کا آغاز کیا تھا۔

اس کے بعد انہوں نے دل والے دلہنیا لے جائیں گے، کچھ کچھ ہوتا ہے، چک دے انڈیا، سوادیس، مای نیم از خان اور حالیہ پٹھان جیسی کئی بلاک بسٹر فلموں کے ذریعے اپنے فن کا لوہا منوایا۔تاہم، یہ پہلا موقع ہے جب انہیں بھارتی فلمی دنیا کے سب سے بڑے اعزاز یعنی نیشنل فلم ایوارڈ سے نوازا گیا ہے۔جوان میں شاہ رخ خان نے ڈبل رول ادا کیا تھا اور فلم میں وہ سات مختلف روپ میں نظر آئے۔ فلم نہ صرف باکس آفس پر سپرہٹ رہی بلکہ نقادوں نے بھی ان کی اداکاری کو سراہا۔ فلم کی ہدایتکاری ایٹلی کمار نے کی تھی۔