Live Updates

مون سون بارشوں کے باعث 163 شہری جاں بحق ،579 زخمی ، 215 گھر متاثر اور 121 مویشی ہلاک ہوئے، پی ڈی ایم اے کی فلڈ فیکٹ شیٹ جاری

پیر 4 اگست 2025 11:50

لاہور (اُردو پوائنٹ اخبارتازہ ترین - اے پی پی۔ 04 اگست2025ء) پی ڈی ایم اے پنجاب کی مون سون فلڈ کی صورتحال بارے فیکٹ شیٹ جاری کردی گئی ۔ ترجمان پی ڈی ایم اے کے مطابق رواں سال موسم مون سون بارشوں کے باعث مختلف حادثات میں 163 شہری جاں حق 579 زخمی ، 215 گھر متاثر اور 121 مویشی ہلاک ہوئے۔ گزشتہ چو بیس گھنٹوں میں صوبائی دارالحکومت لاہور، راولپنڈی، گجرات، نارووال قصور، جہلم اور منڈی بہاوالدین میں بارشیں ریکارڈ کی گئیں۔

آ ئندہ 24 گھنٹوں میں پنجاب کے بیشتر اضلاع میں بارشیں متوقع ہیں۔مون سون بارشوں کا چھٹا اسپیل( کل)منگل سے شروع ہونے کی پیشگوئی ہے ۔ڈی جی پی ڈی ایم اے پنجاب عرفان علی کاٹھیا کی انتظامیہ کو الرٹ رہنے کی ہدایات جاری کرتے ہوئے کہا ہے کہ دریائے سندھ میں تربیلا، کالا باغ، چشمہ اور تونسہ کے مقام پر نچلے درجے کا سیلاب ہے۔

(جاری ہے)

دریائے چناب، جہلم، راوی اور ستلج میں پانی کا بہاو نارمل سطح پر ہے۔

رودکوہیوں اور بڑے دریاوں سے ملحقہ ندی نالوں میں بھی پانی کا بہا ونارمل سطح پر ہے۔ ڈی جی عرفان علی کاٹھیا نے کہا کہ تربیلا ڈیم 91 فیصد جبکہ منگلا ڈیم 60 فیصد تک بھر چکاہے۔بھارتی ڈیمز میں پانی کی سطح 56 فیصد تک ہے۔ ڈی جی پی ڈی ایم اے نے کہا کہ شہریوں سے اپیل ہے کہ موسم برسات میں احتیاطی تدابیر اختیار کریں۔بچوں کا خیال رکھیں انہیں برساتی نالوں نشیبی علاقوں دریاں اور نہروں میں ہرگز مت نہانے دیں۔ انہوں نے کہا کہ رواں سال موسم مون سون بارشوں کے باعث مختلف حادثات کے باعث متاثرین کی وزیر اعلی پنجاب کی ہدایات کے پیشِ نظر مالی امداد کی جارہی ہے ۔