پاکستان کا شمار ماحولیاتی تبدیلیوں سے شدید متاثر ہونیوالے 10 ممالک میں ہوتا ہے،وزیر اعظم

گلگت بلتستان میں دانش سکول کا جلد قیام عمل میں لایا جائیگا، سولر پارک منصوبے کی ذاتی طور پر نگرانی کر رہا ہوں،شہباز شریف

پیر 4 اگست 2025 17:46

پاکستان کا شمار ماحولیاتی تبدیلیوں سے شدید متاثر ہونیوالے 10 ممالک ..

گلگت(اُردو پوائنٹ اخبارتازہ ترین - این این آئی۔ 04 اگست2025ء)وزیر اعظم شہباز شریف نے کہا ہے کہ پاکستان موسمیاتی تبدیلیوں سے شدید متاثر ہونے والے ممالک میں شامل ہے، عالمی سطح پر کاربن گیسز کے اخراج میں ہمارا حصہ انتہائی کم ہے۔پیرکوگلگت بلتستان میں بارشوں اور سیلابی صورتحال سے متعلق اجلاس میں گفتگو کرتے ہوئے انہوں نے کہا کہ گلگت بلتستان میں حالیہ بارشوں سے بہت نقصانات ہوئے، بارشوں کی وجہ سے جانی و مالی نقصانات پر افسوس ہے۔

(جاری ہے)

شہباز شریف نے کہاکہ گلگت بلتستان میں سیلاب اور کلاؤڈ برسٹ سے نقصانات کا جائزہ لینے آیا ہوں، وفاقی ادارے گلگت بلتستان حکومت کے ساتھ مکمل رابطے میں ہیں۔انہوں نے کہاکہ پاکستان کا شمار ماحولیاتی تبدیلیوں سے شدید متاثر ہونے والے 10 ممالک میں ہوتا ہے، 2022ء میں بھی بارشوں اور سیلاب نے بہت تباہی مچائی، ہر سال ہم موسمیاتی تبدیلیوں سے متاثر ہو رہے ہیں۔ انہوںنے کہاکہ درپیش چیلنجز سے نمٹنے کیلئے وزارت موسمیاتی تبدیلی کو ہدایات دی گئی ہیں، موسمیاتی تبدیلیوں کے چیلنجز سے نمٹنے کیلئے اقدامات وقت کی ضرورت ہیں۔وزیر اعظم نے کہاکہ گلگت بلتستان میں دانش سکول کا جلد قیام عمل میں لایا جائے گا، سولر پارک منصوبے کی ذاتی طور پر نگرانی کر رہا ہوں۔