موسمیاتی تبدیلیوں سے پیدا ہونے والے چیلنجز سے نمٹنے کیلئے اقدامات وقت کی ضرورت ہے،وزیراعظم

پیر 4 اگست 2025 18:08

گلگت(اُردو پوائنٹ اخبارتازہ ترین - این این آئی۔ 04 اگست2025ء)وزیراعظم محمد شہباز شریف نے موسمیاتی تبدیلیوں سے پیدا ہونے والے چیلنجز سے نمٹنے کیلئے اقدامات کو وقت کی اہم ترین ضرورت قرار دیتے ہوئے کہا ہے کہ پاکستان میں ہرسال موسمیاتی تبدیلیوں سے تباہی ہورہی ہے۔پیرکویہاں دورے کے دوران گلگت میں حالیہ بارشوں و سیلابی صورتحال کا جائزہ لینے کیلئے منعقدہ اجلاس سے خطاب کرتے ہوئے وزیراعظم نے کہا کہ حالیہ دنوں میں گلگت بلتستان میں مختلف مقامات پر بادل پھٹنے سے شدید تباہی ہوئی جس سے بابوسر، گانچھے، دیامر سمیت کئی علاقے شدید متاثر ہوئے۔

وزیراعظم نے حادثات میں جاں بحق ہونے والوں کیلئے مغفرت اور زخمیوں کی جلد صحت یابی کی دعا کرتے ہوئے کہا کہ آج صورتحال کا جائزہ لینے کیلئے وہ مواصلات ، آبی وسائل ، این ڈی ایم اے سمیت متعلقہ وزارتوں اور محکموں کے وزراء اور حکام کے ساتھ یہاں آئے ہیں۔

(جاری ہے)

وزیراعظم نے کہا کہ عالمی سطح پرکاربن گیسز کے اخراج میں ہمارا حصہ انتہائی کم ہے لیکن پاکستان موسمیاتی تبدیلیوں سے شدید متاثر ہونے والے ممالک میں شامل ہے۔

انہوں نے کہا کہ ہر سال سیلابوں سے تباہی آتی ہے،موسمیاتی تبدیلیوں کے چیلنجز سے نمٹنے کیلئے اقدامات وقت کی ضرورت ہیں۔ انہوں نے وزارت موسمیاتی تبدیلی کو ہدایت کی کہ وہ اس حوالے سے ضروری اقدامات کریں ، دنیا میں موسمیاتی تبدیلی کے حوالیسے بہت کانفرنسز ہوتی ہیں جن میں ہم بھی شرکت کرتے ہیں ، دنیا سے ریزیلئنٹ انفراسٹرکچر کے حوالے سے دنیا سے فنڈز لے کر آئیں کیونکہ گلگت بلتستان اورآزاد کشمیر سمیت پورا ملک موسمیاتی تبدیلیوں سے متاثر ہورہا ہے۔

وزیراعظم نے کہا کہ وہ جلد دوبارہ گلگت بلتستان کا دورہ کریں گے جس میں گلگت بلتستان میں دانش سکول کا سنگ بنیاد رکھا جائے گا۔ انہوں نے کہا کہ وہ سولرپارک منصوبے کی ذاتی طور پر نگرانی کررہے ہیں اس پر کام تیز کریں گے اور اس منصوبے کو اپنی ذاتی نگرانی میں مکمل کرائیں گے۔