واروک یونیورسٹی لندن میں منعقدہ 3 روزہ الہدایہ تربیتی کیمپ اختتام پذیر

اسلام آباد(اُردو پوائنٹ اخبارتازہ ترین - این این آئی۔ 05 اگست2025ء)منہاج القرآن انٹرنیشنل کے زیر اہتمام واروک یونیورسٹی لندن برطانیہ میں منعقدہ 3 روزہ الہدایہ تربیتی کیمپ 2025 اختتام پذیر ہو گیا۔ تربیتی کیمپ میں برطانیہ، یورپ، امریکہ، کینیڈا، پاکستان سمیت دیگر ملکوں سے 13سو سے زائد مسلم فیملیز نے شرکت کی۔ اختتامی سیشن سے شیخ الاسلام ڈاکٹر طاہرالقادری نے خطاب کرتے ہوئے کہا کہ نوجوان کتاب سے ودستی کریں، باکردار اور تعلیم یافتہ نوجوان ہی امہ کا محفوظ مستقبل ہیں، امت کے نوجوان ایمان کی حفاظت کے ساتھ ساتھ جدید علوم کے حصول پر توجہ مرکوز رکھیں،تحریک منہاج القرآن نوجوانوں کو علم اور امن کے راستے پر چلا رہی ہے۔

الہدایہ کیمپ سے منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری، نوجوان مذہبی سکالر شیخ حماد مصطفی المدنی القادری اور منہاج القرآن انٹرنیشنل ویمن لیگ کی مرکزی صدر ڈاکٹر غزالہ قادری نے لیکچرز دئیے۔

(جاری ہے)

شیخ الاسلام ڈاکٹر محمد طاہرالقادری نے مغرب میں مقیم یوتھ کے ساتھ سوال و جواب کا خصوصی سیشن بھی منعقد کیا۔

پروفیسر ڈاکٹر حسن محی الدین قادری نے الہدایہ 2025 کے اختتامی سیشن سے خطاب کرتے ہوئے کہا کہ تحریک منہاج القرآن نوجوانوں کو علم اور امن کے راستے پر چلارہی ہے۔ شیخ الاسلام فرقہ واریت کے خاتمہ اوربین المذاہب رواداری کے فروغ کیلئے اس دور میں ایک توانا آواز ہیں۔ منہاج القرآن انٹرنیشنل ویمن لیگ کی مرکزی صدر ڈاکٹر غزالہ قادری نے خواتین کے تربیتی سیشن سیروحانی ترقی کے مدارج کے موضوع پر خطاب کرتے ہوئے توبہ، تقوی، خود احتسابی اور صبر کا فلسفہ بیان کیا۔

انہوں نے کیمپ میں شریک خواتین کو نصیحت کی کہ اچھا اخلاق انسان کو باوقار بناتا ہے۔ دوسروں پر بلاجواز تنقید نہ کریں اس سے رشتے کمزور ہوتے ہیں۔ سچی توبہ وہ ہے جس سے انسان گناہ کا اعادہ نہ کرے۔ انہوں نے کہا کہ غیر شائستہ الفاظ انسانی جسم اور روح کو گھائل کرتے ہیں۔ ہمیشہ سوچ سمجھ کر بات کریں۔ نوجوان مذہبی سکالر شیخ حماد مصطفی المدنی القادری نے الفتوت کے موضوع پر نوجوانوں کے تربیتی سیشن سے خطاب کرتے ہوئے کہا کہ ایثار، بہادری اور جوانمردی یہ ہے کہ دوسروں کے عزت نفس کو مجروح نہ ہونے دیں۔

دین رسوم و رواج یا عبادات تک محدود نہیں ہے یہ ایک مکمل معاشرتی اور سماجی نظام ہے۔ نمازیں اور روزے یتیموں کی حق تلفی اور ظلم کرنے والوں کے کسی کام نہیں آئیں گے۔ انہوں نے کہا کہ حضور نبی اکرمؓ نے فرمایا ایک مومن کی زندگی کا عرصہ دوسروں کی خدمت میں بسر ہوتا ہے۔