پنجاب پولیس یوم استحصال کشمیر پر کشمیریوں کی دلیرانہ جدوجہد کو سلام پیش کرتی ہے، ڈاکٹر عثمان انور

منگل 5 اگست 2025 22:20

لاہور (اُردو پوائنٹ اخبارتازہ ترین - اے پی پی۔ 05 اگست2025ء) انسپکٹر جنرل پولیس پنجاب ڈاکٹر عثمان انور نے یوم استحصال کشمیر کے موقع پر کہا کہ پنجاب پولیس مقبوضہ جموں و کشمیر کے عوام کی دلیرانہ جدوجہد کو سلام پیش کرتی ہے۔ اپنے ایک پیغام میں انہوں نے کہا کہ پنجاب پولیس گزشتہ کئی دہائیوں سے جاری بھارتی غاصبانہ قبضے اور جموں و کشمیر کی خصوصی حیثیت ختم کرنے کی پرزور مذمت کرتی ہے،مقبوضہ کشمیر کے عوام گزشتہ کئی دہائیوں سے آزادی، حق خودارادیت اور بقا کی جنگ لڑ رہے ہیں۔

(جاری ہے)

انہوں نے کہا کہ یوم استحصال کشمیر پر صوبائی دارالحکومت سمیت صوبہ بھر میں سکیورٹی ہائی الرٹ اور شرپسند و ملک دشمن عناصر پر کڑی نظر رکھی جائے گی۔کسی بھی شخص کو قانون ہاتھ میں لینے اور امن و امان سبوتاژ کرنے کی ہرگز اجازت نہ دی جائے۔ ترجمان پنجاب پولیس نے بتایا کہ لاہور سمیت صوبہ بھر میں 10ہزار سے زائد پولیس افسران و اہلکار سکیورٹی و ٹریفک انتظامات پر تعینات کیے گئے۔ لاہور سمیت صوبہ بھر میں یوم استحصال کشمیر پر منعقدہ ریلیوں اور سیمینارز سمیت پروگراموں کو فول پروف سکیورٹی فراہم کی گئی۔ حساس مقامات پر منعقدہ یوم استحصال کشمیر ریلیز اور اے کیٹگری پروگراموں پر اضافی نفری تعینات کی گئی تھی۔