سبی میں ریلوے ٹریک پر دھماکہ، جعفر ایکسپریس حادثے سے بال بال بچ گئی

کوئٹہ ( اُردو پوائنٹ اخبارتازہ ترین۔ 07 اگست 2025ء ) صوبہ بلوچستان کے علاقہ سبی میں ریلوے ٹریک پر دھماکہ ہوا ہے تاہم جعفر ایکسپریس حادثے سے بال بال بچ گئی۔ تفصیلات کے مطابق سبی میں ریلوے ٹریک پر دھماکہ کوئٹہ سے پشاور جانے والی جعفر ایکسپریس کے گزر جانے کے بعد ہوا، جس کے باعث خوش قسمتی سے ٹرین کسی بھی قسم کے حادثے سے محفوظ رہی اور دھماکے سے کوئی نقصان نہیں ہوا، جب کہ بلوچستان سے تعلق رکھنے والی کالعدم شدت پسند تنظیم بی ایل اے نے اس دھماکے کی ذمہ داری قبول کرلی۔

بتایا جارہا ہے کہ دو روز قبل بھی جعفر ایکسپریس پر دوبارہ حملے کی کوشش کی گئی تھی جس کی وجہ سے ٹرین کو روک دیا گیا، بھارتی سپانسرڈ دہشت گرد تنظیم فتنۃ الہندوستان بلوچ لبریشن آرمی (بی ایل اے) نے حملے کی ذمہ داری بھی قبول کی تھی، 4 اگست کو کوئٹہ سے پشاور کے روٹ پر چلنے والی مسافر ٹرین جعفر ایکسپریس پر اس وقت ایک اور حملے کی کوشش کی گئی جب پیر کی صبح کولپور کے قریب ریلوے ٹریک کی کلیئرنس کے لیے بھیجے گئے پائلٹ انجن پر فائرنگ کی گئی جس کے نتیجے میں ٹرین کو دوزان ریلوے سٹیشن پر ہی روک دیا گیا، اس واقعے میں کوئی جانی نقصان نہیں ہوا۔

(جاری ہے)

ریلوے انتظامیہ کا کہنا تھا کہ جعفر ایکسپریس سے قبل ایک پائلٹ انجن کوئٹہ سے سبی تک ٹریک کی جانچ کے لیے چلایا جاتا ہے تاکہ کسی ممکنہ تخریب کاری سے بچا جا سکے، اسی سلسلے میں پیر کی صبح دوزان کے قریب واقع ٹنل نمبر 16 کے قریب اس پائلٹ انجن پر فائرنگ کی گئی اس دوران انجن کو پانچ گولیاں لگیں تاہم انجن کا ڈرائیور اور دیگر عملہ محفوظ رہا، فائرنگ کے بعد انجن کو بحفاظت دوزان سٹیشن پہنچا دیا گیا اور واقعے کی تحقیقات شروع کردی گئیں۔

اس سے پہلے صوبہ سندھ کےعلاقہ شکارپور کے قریب پشاور سے کوئٹہ جانے والی جعفر ایکسپریس کو حادثہ پیش آیا تھا جس کے نتیجے میں 3 بوگیاں پٹری سے اتر گئیں، ریلوے حکام نے بتایا کہ جعفر ایکسپریس سلطان کوٹ ریلوے سٹیشن کے قریب حادثے کا شکار ہوئی جہاں ریلوے ٹریک پر دھماکے کی وجہ سے مسافر ٹرین کی تین بوگیاں ٹریک سے اترگئیں، حادثے میں کوئی جانی نقصان نہیں ہوا تاہم حادثے کے باعث ریلوے ٹریک کو نقصان پہنچا اور ریلوے ٹریفک بلاک ہوگئی۔