عوام پر ٹیکسوں کا بوجھ ڈالنے والی حکومت نے اپنے اخراجات مزید بڑھا لیے

لاہور (اُردو پوائنٹ اخبارتازہ ترین۔ 07 اگست2025ء) عوام پر ٹیکسوں کا بوجھ ڈالنے والی حکومت نے اپنے اخراجات مزید بڑھا لیے، صرف ایک سال میں وفاقی حکومت کے اخراجات میں 100 ارب روپے سے زائد کا اضافہ، حکومتی اخراجات کا حجم 900 ارب روپے کے قریب پہنچ گیا۔ جیو نیوز کی رپورٹ کے مطابق وفاقی حکومت کے امور چلانے کا خرچہ تقریباً 14 فیصد بڑھ گیا۔ اخراجات 108 ارب روپے اضافے کے ساتھ 892 ارب روپے پر پہنچ گئے۔

ایک رپورٹ کے مطابق حکومت کے معیشت درست سمت میں گامزن ہو جانے کے دعووں کے باوجود نئے مالی سال کے پہلے ماہ جولائی 2025 کے سامنے آنے والے تجارتی اور معاشی اعداد و شمار نے حکومتی دعووں پر سوالیہ نشان لگا دیا۔ میڈیا رپورٹس کے مطابق وزارت خزانہ نے گزشتہ مالی سال 2024ء تا 2025ء کے دوران وفاقی حکومت کے آمدن و اخراجات کی تفصیلات جاری کردی ہیں۔

(جاری ہے)

گزشتہ مالی سال کے دوران وفاقی حکومت کی خالص آمدن 9 ہزار 946 ارب روپے ریکارڈ کی گئی جبکہ حکومتی اخراجات 17 ہزار 36 ارب روپے تک پہنچ گئے، اس عرصے کے دوران مالی خسارہ کم ہو کر جی ڈی پی کا 5.4 فیصد تک محدود رہا، مالی خسارے کا حجم 7 ہزار 90 ارب روپے ریکارڈ کیا گیا۔ وزارت خزانہ کی رپورٹ کے مطابق قابل تقسیم محاصل سے صوبوں کو 6 ہزار 854 ارب روپے منتقل کئے، قرضوں پر سود کی ادائیگی میں 8 ہزار 847 ارب روہے خرچ ہوئے۔

رپورٹ میں بتایا گیا ہے کہ ایف بی آر 12970 روپے کا اصل سالانہ ہدف حاصل کرنے میں کامیاب نہ ہوا، گزشتہ مالی سال 11 ہزار 744 ارب ٹیکس جمع، ہدف سے 1226 ارب کم رہا۔ دوسری جانب میڈیا رپورٹس کے مطابق رواں مالی سال کے پہلے ہی ماہ میں تجارتی خسارہ بے قابو ہو گیا۔ رواں مالی سال 26-2025 کے پہلے مہینے جولائی میں سالانہ بنیادوں پر تجارتی خسارہ 44.16 فیصد کے بڑے اضافے سے 2 ارب 75 کروڑ 20 لاکھ ڈالرز تک پہنچ گیا۔

پاکستان ادارہ شماریات کی جانب سے جولائی 2025 کے جاری تجارتی اعداد و شمار کے مطابق گزشتہ مہینے برآمدات سالانہ بنیادوں پر 16.91 فیصد اور ماہانہ بنیادوں پر 8.88 فیصد اضافے سے 2 ارب 69 کروڑ 70 لاکھ ڈالرز رہیں۔ ادارہ شماریات کے مطابق اسی طرح جولائی 2025 میں سالانہ بنیادوں پر درآمدات 29.25 فیصد اور ماہانہ بنیادوں پر 12.37 فیصد بڑھیں جبکہ درآمدات کا حجم 5 ارب 44 کروڑ 90 لاکھ ڈالرز ریکارڈ کیا گیا۔ اعداد و شمار سے مزید پتا چلتا ہے کہ جولائی میں تجارتی خسارہ سالانہ بنیادوں پر 44.16 فیصد اور ماہانہ بنیادوں پر 16.02 فیصد اضافے سے 2 ارب 75 کروڑ 20 لاکھ ڈالرز ریکارڈ کیا گیا۔