چہلم امام حسینؓ،خواجہ سلمان رفیق ،ڈاکٹر احمد جاوید قاضی کی محکمہ داخلہ میں علماء کرام کے وفود سے ملاقات

لاہور (اُردو پوائنٹ اخبارتازہ ترین - این این آئی۔ 07 اگست2025ء) چہلم امام حسین ؓ کے حوالے سے انتظامات کا جائزہ کے حوالے صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق اور سیکرٹری داخلہ پنجاب ڈاکٹر احمد جاوید قاضی نے محکمہ داخلہ میں علماء کرام کے وفود سے ملاقات کی۔ملاقات کرنے والے علماء کرام کا تعلق الجامعتہ الاشرفیہ، شیعہ علماء کونسل پاکستان اور مرکزی عزاداری اتحاد کونسل پاکستان سے تھا۔

الجامعتہ الاشرفیہ کے وفد میں حافظ اسد عبید، علامہ ہشام الہٰی ظہیر، مولانا نصیر احمد احرار، مولانا بابر فاروق رحیمی، مولانا عبدالوحید روپڑی، میاں طارق و دیگر موجود تھے۔ شیعہ علماء کونسل پاکستان وسطی پنجاب کے وفد میں علامہ ساجد حسین نقوی،قاسم علی قاسمی، سید سخی حسین، علامہ فضل عباس جعفری، ڈاکٹر ممتاز حسین، عامر علی خان اور سید علی حسنین شامل تھے۔

(جاری ہے)

مرکزی عزاداری اتحاد کونسل پاکستان سے آغا الماس کاظمی، سید جعفر علی شاہ، سید منصور رضا، سید حسن رضوی، کامران نقوی، سید ظفر عسکری، سید ظل حسین، حسنین شاہ، سید آل حیدر شاہ، قادر گجر اور سید مہدی شاہ کے علاوہ دیگر نے شرکت کی۔محکمہ داخلہ سے سپیشل سیکرٹری فضل الرحمن، ایڈیشنل سیکرٹری انٹرنل سکیورٹی کنور انوار علی خان اور ڈپٹی سیکرٹری داخلہ سمیت دیگر افسران موجود تھے۔

ملاقات کے دوران پنجاب میں امن و امان کی صورتحال بارے تبادلہ خیال کیا گیا۔ علماء کرام نے محرم الحرام کے دوران امن و امان یقینی بنانے پر وزیراعلی پنجاب مریم نواز شریف کا شکریہ ادا کیا۔علماء کرام نے چہلم پر امن و امان کیلئے حکومتی اقدامات کی مکمل تائید کی یقین دہانی کروائی۔ صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے اظہارخیال کرتے ہوئے کہا کہ پنجاب میں امن عامہ کی خاطر تمام مکاتب فکر سے تعلق رکھنے والے علماء کرام یکجان اور متحد ہیں،محرم الحرام کے دوران سکیورٹی فرائض سر انجام دینے پر محکمہ داخلہ، پولیس، ریسکیو، اوقاف، بلدیات، واپڈا، ضلعی انتظامیہ کی کاوشوں کو سراہتے ہیں۔

انہوںنے کہا کہ پاکستان کے ایران کے ساتھ تعلقات الحمدللہ انتہائی پائیدار اور مضبوط ہیں، ہمیں ہر قسم کے اختلافات اور تحفظات سے بالاتر ہو کر پاکستان کی سلامتی کی خاطر اکھٹے ہونا ہے۔ پاکستان کی سلامتی کیلئے تمام مکاتب فکر ایک پیج پر ہیں۔ سیکرٹری داخلہ پنجاب ڈاکٹر احمد جاوید قاضی نے اظہارخیال کرتے ہوئے کہا کہ علمائے کرام پنجاب میں امن کے کارواں کا بنیادی جزو ہیں، حکومت پنجاب قیام امن کیلئے تمام سٹیک ہولڈرز کیساتھ مکمل کوآرڈینیشن میں ہے اورمحرم الحرام کے دوران تمام مکاتب فکر سے تعلق رکھنے والے علماء کرام کا سو فیصد تعاون حاصل رہا۔

علمائے کرام نے کہاکہ ملکی سلامتی کیلئے حکومت پنجاب کے ساتھ مکمل تعاون کریں گے۔تمام مکاتب فکر باہمی اتحاد کیساتھ قانون کی پاسداری یقینی بنائیں گے۔ علمائے کرام نے حکومت پنجاب کی جانب سے امن عامہ کیلئے اقدامات کو سراہا۔