پولیس افسران کا فیصل آباد پریس کلب کا دورہ، صحافیوں سے ملاقات میں تعلقات مضبوط بنانے کا اعادہ کیا

جمعرات 7 اگست 2025 23:50

فیصل آباد (اُردو پوائنٹ اخبارتازہ ترین - اے پی پی۔ 07 اگست2025ء) اعلیٰ پولیس افسران نے فیصل آباد پریس کلب کا اہم دورہ کیا۔ تفصیلات کے مطابق فیصل آباد فوٹو جرنلسٹ ایسوسی ایشن کے صدر محمد طاہر کی خصوصی دعوت پر اعلیٰ پولیس افسران نے فیصل آباد پریس کلب کا اہم دورہ کیا۔ اس دورے کا مقصد صحافی برادری کے ساتھ روابط کو مضبوط بنانا، سکیورٹی امور پر تعاون کو فروغ دینا، اور باہمی ہم آہنگی کو بہتر بنانا تھا۔

اس موقع پر اے ایس پی کیپٹن رحیم، اے ایس پی کریم مستوئی، اے ایس پی مزمل، اے ایس پی اویس سرور، اے ایس پی میڈم عروب، اور اے ایس پی ڈاکٹر مریم سمیت دیگر افسران بھی ہمراہ تھے۔ صحافیوں کی جانب سے پولیس افسران کا پرتپاک استقبال کیا گیا۔پریس کلب کی نمائندگی سیکرٹری پریس کلب عزادار عابدی، سابق سیکرٹری کاشف فرید، فوٹو جرنلسٹ ایسوسی ایشن کے جنرل سیکرٹری بشیر احمد تایا، عقیل پرویز، ملک ظہور احمد، نثار احمد خان، عزیز بٹ، طارق محمود کمبوہ، رانا ندیم اور اختر علی حسن سمیت دیگر نمائندگان نے کی۔

(جاری ہے)

ملاقات میں پولیس اور صحافیوں کے درمیان اعتماد، تعاون اور ہم آہنگی کی ضرورت پر زور دیا گیا۔ مقررین نے اس موقع پر کہا کہ ایک پرامن اور باخبر معاشرے کے قیام کے لیے پولیس اور میڈیا کا باہمی اشتراک ناگزیر ہے۔ عوام تک درست اور بروقت معلومات کی ترسیل میں میڈیا کا کردار کلیدی ہے، جبکہ پولیس امن و امان کی بحالی میں فرنٹ لائن پر موجود ہوتی ہے۔

پولیس افسران نے پریس کلب کے دورے کو خوش آئند قرار دیتے ہوئے کہا کہ ایسے دورے نہ صرف افہام و تفہیم کو بڑھاتے ہیں بلکہ مختلف طبقات کے درمیان فاصلے کم کرنے میں بھی معاون ثابت ہوتے ہیں۔ انہوں نے یقین دہانی کروائی کہ صحافی برادری کے مسائل کو ترجیحی بنیادوں پر حل کیا جائے گا اور آئندہ بھی ملاقاتوں کا یہ سلسلہ جاری رہے گا۔پریس کلب کے شرکاء نے اس مثبت اقدام کو سراہا اور کہا کہ اداروں کے درمیان مضبوط رابطے ہی ایک پرامن اور ترقی یافتہ پاکستان کی ضمانت ہیں۔