پولیو وائرس کا پھیلائو بڑھا ہے مگر بہتری کی جانب کام جاری ہے، عائشہ رضا فاروق

جمعہ 8 اگست 2025 18:54

اسلام آباد (اُردو پوائنٹ اخبارتازہ ترین - اے پی پی۔ 08 اگست2025ء) وزیر اعظم کی فوکل پرسن برائے پولیو عائشہ رضا فاروق نے کہا ہے کہ پولیو وائرس کا پھیلائو بڑھا ہے مگر بہتری کی جانب کام جاری ہے۔ان خیالات کا اظہار انہوں نے نیشنل پولیو مینجمنٹ ٹیم کے اجلاس کے دوران کیا ۔انہوں نے صوبوں میں پولیو کی صورتحال کا جائزہ لیتے ہوئے پولیو ورکرز کو خراج تحسین پیش کیا اور کہا کہ ورکرز چیلنجز کے باوجود بہترین کام کر رہے ہیں ،پولیو وائرس کا پھیلائو بڑھا ہے مگر بہتری کی جانب کام جاری ہے۔

انہوں نے کہا کہ اس سال روایتی طریقوں سے ہٹ کر کام کریں گے، نئے حل تلاش کئے جائیں گے،پولیو مہم سے پہلے کا دورانیہ نتائج کے لئے نہایت اہم ہے۔عائشہ رضا فاروق نے کہا کہ پولیو، حفاظتی ٹیکہ جات پروگرام کا اشتراک پولیو کے خاتمے کا اہم ستون ہے۔

(جاری ہے)

انہوں نےخیبر پختونخوا ٹیم کو جنوبی اضلاع میں سکیورٹی چیلنجز سے نمٹنے کی ہدایت کرتے ہوئے کہا کہ پولیو ہاٹ سپاٹس پر توجہ کے ساتھ ساتھ بہتر اضلاع پر بھی توجہ برقرار رکھیں،ہمیں ایک ٹیم بن کر کام کرنا ہوگا تبھی کامیابی ممکن ہے۔

انہوں نے کہا کہ اس بار ہمیں پاکستان کو فائنل لائن تک لے جانا ہے،پولیو خاتمے کے ہدف کے لئے ہر سطح پر حقیقی احتساب ضروری ہے۔انہوں نےپولیو ورکرز، قانون نافذ کرنے والے اداروں کو خراج تحسین پیش کیا ۔اجلاس میں نیشنل ایمرجنسی آپریشن سنٹر، چاروں صوبائی کوآرڈینیٹرز سمیت بین الاقوامی انسداد پولیو پارٹنرز کی شرکت کی۔