وسائل پر قبضہ کسی صورت برداشت نہیں کریں گے ، ایمل ولی خان

ہفتہ 9 اگست 2025 22:03

پشاور(اُردو پوائنٹ اخبارتازہ ترین - این این آئی۔ 09 اگست2025ء) عوامی نیشنل پارٹی کے مرکزی صدر سینیٹر ایمل ولی خان نے کہا ہے کہ وہ اقتدار، کرسی یا کسی عہدے کے خواہشمند نہیں بلکہ اپنے وطن پر ہونے والے حملوں کے خلاف غیرت اور حوصلے کے ساتھ ڈٹے ہوئے ہیں۔ بلوچ اور پختون کے مسائل ایک جیسے ہیں، اور صرف باہمی اتحاد سے ہی ہم اپنے وسائل، امن اور جمہوریت کا تحفظ کر سکتے ہیں۔

ریاست کو دوٹوک وارننگ دیتے ہوئے انہوں نے کہا کہ ہمارے وسائل پر قبضے کی کسی بھی کوشش کو ہرگز برداشت نہیں کیا جائے گا۔مسلم باغ (ہندو باغ) میں شہدائے 8 اگست کی یاد میں منعقدہ عظیم الشان جلسہ عام سے خطاب کرتے ہوئے ایمل ولی خان نے کہا کہ اس دھرتی کے وکلاء اور شہداء نے امن، انصاف اور ایک نظریے کی خاطر اپنی جانوں کے نذرانے پیش کیے۔

(جاری ہے)

ان کی قربانیوں کا درد آج بھی تازہ ہے، اور نو سال گزرنے کے باوجود یہ زخم یوں لگتا ہے جیسے کل ہی لگا ہو۔

انہوں نے کہا کہ ہر دور میں چاہے وہ انگریز کا تسلط ہو یا موجودہ ریاستی جبر ہمارے شہداء نے اپنی جانیں دے کر ہمیں عزت اور وقار بخشا، اور ہم خوش قسمت ہیں کہ ایسے عظیم لوگوں کے وارث ہیں۔انہوں نے واضح کیا کہ امن، خودمختاری اور وسائل پر اختیار کی جدوجہد آج بھی زندہ ہے، جیسے یہ باچا خان اور خان عبدالولی خان کے زمانے میں تھی۔ ایمل ولی خان نے کہا کہ بلوچستان اور خیبر پختونخوا میں مائنز اینڈ منرلز اور 18ویں آئینی ترمیم پر براہِ راست حملے کیے جا رہے ہیں، جو ہمارے مستقبل اور آنے والی نسلوں کے حق پر ڈاکہ ہیں۔

مرکزی صدر نے کہا کہ 18ویں ترمیم ہمارے بچوں کا آئینی حق ہے، اور وسائل عوام کی ملکیت ہیں، کسی اور کی نہیں، اگر آئین نہ ہو تو پاکستان کا وجود بھی سوالیہ نشان ہے۔ انہوں نے عوام سے عہد لیا کہ وہ عدم تشدد کے راستے پر چلتے ہوئے، باچا خان کے نظریے کو اپنا کر اپنے حقوق کے لیے ڈٹ کر کھڑے رہیں گے، اور واضح کر دیا کہ یہ زمین، یہ وسائل اور یہ حق صرف عوام کا ہے۔

Facebook Twitter Google + Share on Whatsapp

وسائل پر قبضہ کسی صورت برداشت نہیں کریں گے ، ایمل ولی خان

متعلقہ عنوان :

مزید قومی خبریں