پاکستان اور امریکا کے درمیان تجارتی حجم میں 16فیصد اضافہ

گزشتہ مالی سال پاک امریکاکا دو طرفہ تجارتی حجم 7 ارب 59 کروڑ 80 لاکھ ڈالرز جبکہ امریکا کی پاکستان کو درآمدات کا حجم ایک ارب 76 کروڑ 30 لاکھ ڈالرز رہا

اتوار 10 اگست 2025 17:35

اسلام آباد(اُردو پوائنٹ اخبارتازہ ترین - این این آئی۔ 10 اگست2025ء)پاکستان اور امریکا کے درمیان 2 طرفہ تجارتی حجم میں 16 فیصد اضافہ ریکارڈ کیا گیا ہے۔ادارہ شماریات کی جانب سے جاری دستاویز کے مطابق گزشتہ مالی سال پاک امریکا دو طرفہ تجارتی حجم 7 ارب 59 کروڑ 80 لاکھ ڈالرز جبکہ امریکا کی پاکستان کو درآمدات کا حجم ایک ارب 76 کروڑ 30 لاکھ ڈالرز رہا۔

ادارہ شماریا ت کے مطابق پاکستان نے ایک سال میں امریکا کو 5 ارب 83 کروڑ ڈالرز کی اشیا برآمد کیں، اسی طرح گزشتہ مالی سال پاکستان کی امریکاکو برآمدات میں 10فیصد اضافہ ہوا۔جاری دستاویزات کے مطابق پاکستان کی امریکا سے درآمدات میں گزشتہ سال 40 فیصد اضافہ ہوا جبکہ ایک سال میں امریکاکے ساتھ پاکستان کا تجارتی سرپلس 4 ارب ڈالر سے زائد رہا۔

(جاری ہے)

ادارہ شماریات نے بتایا کہ امریکا کے لیے بستر، میز، ٹوائلٹ اور کچن چادروں کی برآمدآت کا حجم 1.038 ارب ڈالرز جبکہ امریکا کو مردانہ سوٹ، جیکٹ اور ٹراؤزر کی برآمدات 936 ملین ڈالرز رہیں، اسی طرح پاکستان نے امریکا کو 36 کروڑ 10 ڈالر کی ٹی شرٹس اور 31 کروڑ 20 لاکھ ڈالر ز کی جرسیاں اور پل اوورز کی برآمدات کیں۔جاری دستاویزات کے مطابق امریکا کو چمڑے کی مصنوعات کی برآمدات 16 کروڑ 50 لاکھ ڈالرز رہیں جبکہ پاکستان نے امریکاکو 15کروڑ 70 ڈالر مالیت کے خواتین کے ملبوسات بھی برآمد کیے۔

ادارہ شماریات کی جانب سے جاری دستاویزات میں بتایا گیا کہ پاکستان نے امریکا سے سب سے زیادہ 39 کروڑ 30 لاکھ ڈالرزکی روئی درآمد کی، امریکاسے تقریباً 16 کروڑ ڈالرز کا لوہے اور اسٹیل کا اسکریپ منگوایا گیا جبکہ 13کروڑ 70لاکھ ڈالرز کی سویابین اور 5کروڑ 60لاکھ ڈالرزکا کوئلہ بھی درآمد کیا گیا۔پاکستان نے امریکا سے 4 کروڑ ڈالرز کی کمپیوٹر مشینیں، 3 کروڑ 80 لاکھ ڈالر کی پیٹرولیم آئل مصنوعات، 3 کروڑ 60 لاکھ ڈالر ز کے الیکٹرو میڈیکل آلات درآمد کیے، اسی طرح امریکا سے خشک میوہ جات کی درآمدات کا حجم 3 کروڑ 30 لاکھ ڈالر رہا۔