Live Updates

مون سون بارشوں کے باعث 164 شہری جاں بحق، 216 گھر متاثر اور 121 مویشی ہلاک ہوئے ،ترجمان پی ڈی ایم اے پنجاب

پیر 11 اگست 2025 11:42

لاہور (اُردو پوائنٹ اخبارتازہ ترین - اے پی پی۔ 11 اگست2025ء) پروونشل ڈیزاسٹر مینجمنٹ اتھارٹی (پی ڈی ایم اے)پنجاب نے مون سون فلڈ کی صورتحال بارے فیکٹ شیٹ جاری کردی ۔ ترجمان پی ڈی ایم اے کے مطابق رواں سال مون سون بارشوں کے باعث مختلف حادثات میں 164 شہری جاں بحق،582 زخمی، 216 گھر متاثر اور 121 مویشی ہلاک ہوئے ۔انہوں نے کہا کہ وزیر اعلی پنجاب مریم نواز کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے۔

گزشتہ 24 گھنٹوں میں گجرانوالہ 42، راولپنڈی 19، چکوال 16، فیصل آباد 9، قصور 6، منڈی بہاوالدین 3 اور حافظ آباد میں ایک ملی میٹر تک بارش ریکارڈ کی گئی۔12 اگست تک دریائوں کے بالائی علاقوں میں مون سون سسٹم کمزور رہنے کے امکانات ہیں اور اس دوران موسم گرم اور مرطوب رہے گا اور کہیں کہیں بارشوں کے امکانات ہیں۔

(جاری ہے)

ترجمان کے مطابق 13 اگست سے مون سون بارشوں کے باعث پنجاب کے بڑے دریائوں میں پانی کی سطح میں اضافے کا خدشہ ہے۔

دریائے سندھ میں کالاباغ کے مقام پر نچلے درجے کی سیلابی صورتحال ہے۔ دریائے سندھ میں تربیلا، چشمہ اور تونسہ کے مقام پر پانی کا بہا ئومعمول کی سطح پر ہے۔دریائے چناب، جہلم، راوی اور ستلج میں پانی کا بہائو معمول کی سطح پر ہے جبکہ رودکوہیوں اور بڑے دریاوں سے ملحقہ ندی نالوں میں بھی پانی کا بہائو معمول کی سطح پر ہے۔ تربیلا ڈیم 96 فیصد جبکہ منگلا ڈیم 64 فیصد تک بھر چکاہے۔ ترجمان نے کہا کہ ڈی جی پی ڈی ایم اے کی جانب سے انتظامیہ کو الرٹ رہنے کی ہدایات جاری کر دی گئی ہیں جس میں انہوں نے شہریوں سے بھی اپیل کی کہ موسم برسات میں احتیاطی تدابیر اختیار کریں، بچوں کا خیال رکھیں اور انہیں برساتی نالوں ،نشیبی علاقوں ،دریاں اور نہروں میں ہرگز نہانے مت دیں۔