یومِ آزادی معرکہ حق‘ پاکستان سے محبت کا عہد، شہریوں کی زبانی

یومِ آزادی ہمیں بتاتا ہے کہ یہ آزادی طویل جدوجہد اور بے مثال قربانیوں کا نتیجہ ہے، شہریوں کا اظہار عقیدت

پیر 11 اگست 2025 12:32

اسلام آباد(اُردو پوائنٹ اخبارتازہ ترین - این این آئی۔ 11 اگست2025ء)یومِ آزادی معرکہ حق کے موقع پر پاکستانی شہریوں نے وطن سے محبت کا عہد کیا ہے۔پاکستان کا یومِ آزادی قربانی، اتحاد اور عزم و حوصلے کی روشن داستان کی علامت ہے۔ یہ دن عہد کی تجدید اور ہمارے بزرگوں کی قربانیوں کو یاد کرنے کا دن ہے۔ یومِ آزادی ہمیں بتاتا ہے کہ یہ آزادی طویل جدوجہد اور بے مثال قربانیوں کا نتیجہ ہے۔

یومِ آزادی معرکہ حق پر مختلف شعبوں سے تعلق رکھنے والے شہریوں نے پاکستان کے لیے اپنے جذبات کا اظہار کیا ہے۔

(جاری ہے)

شہریوں نے پیغام دیتے ہوئے کہا کہ پاکستان ایک چمن ہے جو ہماری شان ہے، وہ سرزمین جس سے دنیا میں ہماری پہچان ہے۔ پاکستان ہمارے بزرگوں کی قربانیوں کا ثمر ہے، اسی وجہ سے ہمارے حوصلے ہمیشہ بلند رہتے ہیں۔ایک شہری نے کہا کہ اپنے ہنر سے وطن کا نام دنیا میں روشن کیا ہے، کوئی ہمیں کمزور نہ سمجھے۔ وقت کڑا تو آتا ہے۔ جب دل میں پاکستان لکھا ہو تو خوف دھرا رہ جاتا ہے، بند گلی کھلتی ہے اور منزل خود مل جاتی ہے۔شہریوں نے یوم آزادی کے موقع پر اپنے جذبات کا اظہار کرتے ہوئے کہا کہ روشن کل کا سبز یقین لیے مشکل کی دیوار گرا کر آگے بڑھنا ہے۔