تین ملکی سیریز کیلئے قومی سکواڈ میں تبدیلیوں کا امکان

سلمان مرزا اور احمد دانیال کی یو اے ای کے دورے پر واپسی کا امکان ، شاہین شاہ آفریدی اور حارث رؤف کو آرام دیا جاسکتا ہے : ذرائع

ذیشان مہتاب پیر 11 اگست 2025 12:14

تین ملکی سیریز کیلئے قومی سکواڈ میں تبدیلیوں کا امکان

لاہور (اردو پوائنٹ تازہ ترین اخبار ۔ 11 اگست 2025ء ) پاکستان کرکٹ بورڈ (پی سی بی) کی جانب سے افغانستان اور متحدہ عرب امارات کے خلاف آئندہ سہ ملکی سیریز کے ساتھ ساتھ ایشیا کپ 2025ء کے لیے ٹیم کے ویسٹ انڈیز کے جاری دورے سے واپسی کے بعد قومی اسکواڈ کا اعلان متوقع ہے۔

ذرائع کے مطابق متحدہ عرب امارات میں ہونے والی سہ فریقی سیریز کے اسکواڈ میں فاسٹ بولر سلمان مرزا اور آل راؤنڈر احمد دانیال کی واپسی کے ساتھ چند تبدیلیوں کا امکان ہے۔

ذرائع نے یہ بھی انکشاف کیا ہے کہ سینئر پیسر شاہین آفریدی اور حارث رؤف کو سہ فریقی سیریز کے دوران ورک لوڈ مینجمنٹ کے لیے آرام دیا جا سکتا ہے اور ایشیا کپ کے لیے انہیں شامل کرنے کا منصوبہ ہے۔

سکواڈ میں معمول کے 15 کھلاڑیوں کی بجائے 16 کھلاڑیوں پر مشتمل متوقع ہے جس کا حتمی فیصلہ ہیڈ کوچ مائیک ہیسن اور ٹیم کے کپتان کے درمیان مشاورت کے بعد کیا جائے گا۔

(جاری ہے)

دریں اثناء اوپننگ بلے باز فخر زمان کو آئندہ سہ فریقی سیریز اور ایشیا کپ دونوں کے لیے پاکستان کے اسکواڈ میں شامل کیے جانے کا امکان ہے۔ وہ اس وقت ویسٹ انڈیز کا دورہ کرنے والی ٹیم سے غیر حاضر ہیں۔

فخر زمان بنگلہ دیش کی ٹی ٹونٹی سیریز کے دوران ہیمسٹرنگ انجری کی وجہ سے جاری دورے سے باہر ہو گئے تھے جس میں پاکستان کو 2-1 سے شکست ہوئی تھی۔

سلیکٹرز کو سٹار بلے باز کی واپسی پر یقین ہے کیونکہ ان کی چوٹ شدید نہیں ہے اور امید ہے کہ وہ آنے والے ایونٹس کے لیے وقت پر ٹھیک ہوجائیں گے۔

آل راؤنڈر اور ٹی ٹونٹی ٹیم کے نائب کپتان شاداب خان کی سہ ملکی سیریز اور ایشیا کپ دونوں میں شرکت کا امکان نہیں ہے کیونکہ وہ سرجری کے بعد اپنی بحالی جاری رکھے ہوئے ہیں۔

واضح رہے کہ سہ ملکی سیریز 29 اگست سے 7 ستمبر تک شارجہ کرکٹ اسٹیڈیم میں ہوگی، پاکستان اپنی مہم کا آغاز 29 اگست کو افغانستان کے خلاف مقامی وقت کے مطابق شام 7 بجے کرے گا۔

ہر ٹیم دوسرے سے 2 بار ٹکرائے گی اور ٹاپ دو ٹیمیں 7 ستمبر کو فائنل میں پہنچیں گی۔