پنجاب اسمبلی میں یومِ اقلیت کے موقع پر قرارداد جمع

پیر 11 اگست 2025 22:14

لاہور (اُردو پوائنٹ اخبارتازہ ترین - اے پی پی۔ 11 اگست2025ء) ممبر صوبائی اسمبلی پنجاب سارہ احمد اور مہوش سلطانہ کی جانب سے یومِ اقلیت کے موقع پر پنجاب اسمبلی میں قرارداد جمع کرائی گئی۔ قرارداد میں کہا گیا کہ یہ ایوان فخر کے ساتھ 11 اگست کو یومِ اقلیت کے طور پرمناتا ہے۔ یہ دن پاکستان کی مذہبی اور نسلی اقلیتوں کی قومی یکجہتی، ترقی اور خوشحالی میں گرانقدر خدمات کو خراجِ تحسین پیش کرنے کا موقع فراہم کرتا ہے۔

ایوان نے اپنے غیر متزلزل عزم کا اعادہ کیا کہ آئینِ پاکستان میں درج اقلیتوں کے حقوق، تحفظ اور مساوی حیثیت کو یقینی بنایا جائے گا۔ یہ دن بانی پاکستان قائداعظم محمد علی جناح کے 11 اگست 1947کو دستور ساز اسمبلی میں کئے گئے تاریخی خطاب کی یاد دلاتا ہے، جس میں انہوں نے کہا تھا کہ آپ ریاست پاکستان میں آزاد ہیں۔

(جاری ہے)

قرارداد میں مزید کہا گیا کہ اقلیتوں نے ہر مشکل وقت میں وطن عزیز کے ساتھ شانہ بشانہ کھڑے ہو کر قربانیاں دی ہیں۔

خصوصی طور پر آپریشن بنیان مرصوص کے دوران پاکستان ایئر فورس کے فخر، مسیحی افسر فلائٹ لیفٹیننٹ کامران مسیح کی غیر معمولی جرات کو سراہا گیا، جنہوں نے پوری قوم کو متاثر کیا۔ ایوان نے زور دیا کہ ہر شہری، خواہ وہ کسی بھی مذہب، نسل یا عقیدے سے تعلق رکھتا ہو، مکمل اور مساوی حقوق کا حقدار ہے۔ قرارداد میں اس عزم کا بھی اظہار کیا گیا کہ پنجاب اور پاکستان میں اقلیتوں کے مذہبی، سماجی، معاشی اور ثقافتی حقوق کے تحفظ اور فروغ کے لیے تمام ضروری اقدامات کیے جائیں گے۔

Facebook Twitter Google + Share on Whatsapp

پنجاب اسمبلی میں یومِ اقلیت کے موقع پر قرارداد جمع

متعلقہ عنوان :

مزید قومی خبریں