پیمرا نے 37 اضلاع کیلئے 42 کیبل ٹی وی لائسنس جاری کر دئیے

اسلام آباد (اُردو پوائنٹ اخبارتازہ ترین - اے پی پی۔ 11 اگست2025ء) پاکستان الیکٹرانک میڈیا ریگولیٹری اتھارٹی(پیمرا) نے 20 کمپنیوں کو 37 اضلاع کے لئے 42 کیبل ٹی وی کے لائسنسز جاری کر دیئے ہیں۔ پیمرا کی طرف سے جاری بیان کے مطابق ضلعی سطح پر کامیاب بولی دہندگان کو کیبل ٹی وی لائسنسوں کے اجراء کی تقریب پیر کو پیمرا ہیڈ کوارٹرز اسلام آباد میں منعقد ہوئی جس میں چیئرمین پیمرا محمد سلیم نے مہمانوں کو خوش آمدید کہا۔

یہ امر قابل ذکر ہے کہ پیمرا نے ضلعی سطح پر کیبل ٹی وی لائسنسز کا اجراء پہلی بار متعارف کروایا ہے اور پہلے مرحلے میں اتھارٹی نے ملک بھر کے 143 اضلاع میں لائسنسوں کے اجراء کیلئے خواہشمند کمپنیوں اور افراد سے درخواستوں کی طلبی کیلئے فروری 2025ء میں قومی اخبارات اور پیمرا کی ویب سائٹ پر اشتہارات دئیے جن کی ٹیلی ویژن چینلز، ایف ایم ریڈیو اور کیبل ٹی وی پر بھی تشہیر کی گئی۔

(جاری ہے)

پیمرا کو پورے پاکستان سے 36 کمپنیوں نے 91 درخواستیں جمع کروائیں، بولیوں کا انعقاد 9 اضلاع کیلئے کیا گیا جن میں میانوالی، سیالکوٹ، سوات، ایبٹ آباد، مظفر گڑھ، ساہیوال، پشاور، راولپنڈی اور اٹک شامل ہیں جبکہ 44 اضلاع جہاں ایک یا دو درخواستیں موصول ہوئیں وہاں آفر لیٹر دیئے گئے۔ بولیوں کے کامیاب انعقاد کے بعد 67 لائسنسز کیلئے 29 کمپنیاں عبوری طور پر اہل قرار پائیں۔

ان میں سے 20 کمپنیوں نے اہلیت کے معیار کے مطابق دستاویزات مکمل کر دی ہیں، انہیں پیر کو 37 اضلاع کے لئے 42 لائسنس جاری کئے گئے ہیں۔ اس موقع پر چیئرمین پیمرا محمد سلیم بیگ نے تمام لائسنس یافتگان کو مبارکباد دی اور اس امید کا اظہار کیا کہ یہ کمپنیاں عوام کو میعاری تفریح اور معلومات فراہم کریں گی اور پیمرا قوانین کو ملحوظ خاطر رکھیں گی۔

انہوں نے کہا کہ کیبل آپریٹرز مثبت کردار یقینی بناتے ہوئے نئے نیٹ ورکس کا آغاز کریں گے۔ انہوں نے مزید کہا کہ اتھارٹی نے دوسرے مرحلے کیلئے بھی اشتہارات دئیے ہیں اور درخواستیں جمع کروانے کی تاریخ میں 20 دن کی توسیع کی ہے، امید ہے کہ کیبل آپریٹرز اس میں بھی شرکت کریں گے۔ اس موقع پر ایگزیکٹو ڈائریکٹر جنرل (لائسنسنگ ڈسٹری بیوشن) سردار عرفان اشرف خان، ایگزیکٹو ڈائریکٹر جنرل(لائسنسنگ براڈکاسٹ میڈیا) وکیل خان، ایگزیکٹو ڈائریکٹر جنرل (آپریشنز براڈ کاسٹ میڈیا و تعلقات عامہ) محمد طاہر، ایگزیکٹو ڈائریکٹر جنرل(ایڈمن) خرم صدیقی، ڈائریکٹر جنرل (پنجاب) اکرام برکت، ڈائریکٹر جنرل (لائسنسنگ ڈسٹری بیوشن) عمر وقاص قریشی، ڈائریکٹر جنرل (چیئرمین سیکریٹریٹ) تمثیل حیدر، ڈائریکٹر جنرل (ایگزیکٹو ممبر) رانا احمد مصطفیٰ، سیکرٹری اتھارٹی سعید احمد سومرو، ریجنل ڈائریکٹر پیمرا لاہورقاسم احمد، ریجنل ڈائریکٹر اسلام آباد لیاقت شاہ، ریجنل ڈائریکٹرفیصل آباد وقاص احمد، ریجنل ڈائریکٹررانا محمد آصف، ریجنل ڈائریکٹرسرگودھا محمد خالق، ڈائریکٹرملتان ابوالحسیب سید علی مدثر، ریجنل ڈائریکٹرحیدرآباد نثار احمد پنہور، ریجنل ڈائریکٹرسکھر سید مدثرعلی شاہ معصومی، ریجنل ڈائریکٹرخیبر پختونخوا (سائوتھ) حمایت شاہ، ریجنل ڈائریکٹرخیبر پختونخوا (نارتھ) اورنگزیب خلجی اور پیمرا کے دیگر افسران بھی موجود تھے۔