راولپنڈی میں پسند کی شادی کرنے والی خاتون اور چند ماہ کے بچے کو ذبح کرنے کا معاملہ جائیداد کا تنازعہ نکلا

قاتل بھائی 2 بہنوں کی جائیداد ہتھیانا چاہتا تھا، والد کی جانب سے بیٹوں کی جائیداد بیٹے کے نام کرنے سے انکار کرنے پر قاتل نے والد اور بہنوں کو قتل کر ڈالا

محمد علی منگل 12 اگست 2025 00:41

راولپنڈی (اُردو پوائنٹ اخبارتازہ ترین۔ 11 اگست2025ء) راولپنڈی میں پسند کی شادی کرنے والی خاتون اور چند ماہ کے بچے کو ذبح کرنے کا معاملہ جائیداد کا تنازعہ نکلا، قاتل بھائی 2 بہنوں کی جائیداد ہتھیانا چاہتا تھا، والد کی جانب سے بیٹوں کی جائیداد بیٹے کے نام کرنے سے انکار کرنے پر قاتل نے والد اور بہنوں کو قتل کر ڈالا، راولپنڈی میں پسند کی شادی کرنے والی خاتون اور شیر خوار بچے کو ذبح کرنے والے ملزم نے بزرگ والد اور دوسری بہن کو بھی قتل کر ڈالا، ملزم نے اسلام آباد میں باپ اور بہن کو قتل کیا اور راولپنڈی پہنچ کر دوسری بہن کو قتل کرکے چند ماہ کے بھانجے کو بھی ذبح کر دیا ، ملزم کیخلاف 2 مختلف مقدمات درج کر لیے گئے۔

تفصیلات کے مطابق راولپنڈی اور اسلام آباد میں سفاک شخص نے اپنے ہی والد اور بہنوں کے ساتھ ساتھ چند ماہ کے شیر خوار بچے کو بھی ذبح کر ڈالا۔

(جاری ہے)

میڈیا رپورٹس کے مطابق پولیس کی جانب سے ابتدائی طور پر راولپنڈی میں ایک خاتون اور اس کے چند ماہ کے شیر خوار بچے پر قاتلانہ حملہ ہونے کا واقعہ رپورٹ ہوا۔ پولیس نے بتایا کہ ابتدائی طور پر یہ واقعہ غیرت کے نام پر قتل کیے جانے کا واقعہ معلوم ہوا، بھائی نے پسند کی شادی کرنے پر بہن کو ذبح کر کے قتل کر ڈالا، جبکہ چند ماہ کے شیر خوار بھانجے کو ذبح کر ڈالا۔

بچے کی والدہ جان کی بازی ہار گئی، جبکہ شیر خوار بچے کو تشویش ناک حالت میں ہسپتال منتقل کر دیا گیا۔ بعد ازاں معلوم ہوا کہ سفاک قاتل اس واردات سے قبل اسلام آباد میں اپنے بزرگ والد اور دوسری بہن کو بھی قتل کر چکا تھا۔ ابتدائی تفتیش سے معلوم ہوا کہ سفاک ملزم نے جائیداد کے تنازعے پر والد اور بہنوں کا قتل کیا۔ سفاک قاتل اپنی بہنوں کی جائیداد ہتھیانا چاہتا تھا، تاہم والد نے بیٹے کا مطالبہ مسترد کرتے ہوئے بیٹیوں کو ان کا حق دینے کا فیصلہ کیا، جس پر سفاک ملزم نے والد اور 2 بہنوں کو ذبح کر کے قتل کر ڈالا، شیر خوار بھانجے کو بھی قتل کرنے کی کوشش کی۔

دونوں وارداتوں کے بعد پولیس نے ملزم کو گرفتار کرکے آلہ قتل چھری برآمد کرلی۔ اڈیالہ روڈ جائے وقوع پر ایس پی صدر، اے ایس پی صدر اور پولیس کی بھاری نفری موقع پر پہنچ گئی اور واقعہ میں ملوث شخص کو فوری کارروائی کرتے ہوئے گرفتار کرلیا۔ پولیس کے مطابق تین افراد کے قتل کی سنگین واردات کے دو مقدمات درج ہوں گے، پہلا مقدمہ اسلام آباد کے تھانے شہزاد ٹاؤن میں درج ہوگا جس میں دو افراد قتل ہوئے، دوسرا مقدمہ راولپنڈی کے تھانہ صدر بیرونی میں درج ہوگا جس میں ماں قتل اور بیٹا شدید زخمی ہوا۔