ووٹ دینا ہے تو دیں کیا فرق پڑتا ہے‘ پہلے بھی دیا تھا نکلا نہیں تو کیا ہوا، گورنرسندھ کا عوام سے طنز

کامران ٹیسوری کی جانب سے یہ بات صوبائی دارالحکومت کراچی میں ایک تقریب سے خطاب کرتے ہوئے کہی گئی

ساجد علی منگل 12 اگست 2025 16:10

ووٹ دینا ہے تو دیں کیا فرق پڑتا ہے‘ پہلے بھی دیا تھا نکلا نہیں تو کیا ..

کراچی ( اُردو پوائنٹ اخبارتازہ ترین۔ 12 اگست 2025ء ) گورنرسندھ کامران ٹیسوری نے طنزیہ تبصرہ کرتے ہوئے عوام سے مخاطب ہوکر کہا ہے کہ ووٹ دینا ہے تو دیں کیا فرق پڑتا ہے‘ پہلے بھی دیا تھا نکلا نہیں تو کیا ہوا۔ صوبائی دارالحکومت کراچی میں ایک تقریب سے خطاب کرتے ہوئے انہوں نے کہا کہ ’اس بار سوچ سمجھ کر ووٹ دینا، میں یہ نہیں کہہ رہا کہ نہ دینا، دینا ہے تو بے شک دے دینا کیا فرق پڑتا ہے، پہلے بھی تو دیا تھا لیکن نکلا نہیں تو کیا ہوا، صحیح یا غلط؟‘، گورنر سندھ کی یہ بات سن کر تقریب میں شریک عوام کچھ دیر کیلئے خاموش رہی جس پر وہ ہنس دیئے اور شرکاء بھی ان کی اس ہنسی میں شریک ہوگئے جس پر کامران ٹیسوری نے کہا کہ ’اب سمجھ میں آیا‘۔

اُن (پی ٹی آئی) کو ووٹ دینا ہے تو دیں کیا فرق پڑتا ہے پہلے بھی دیا تھا نکلا نہیں تو کیا ہوا، گورنر سندھ کامران ٹیسوری کا عوام پر طنزیہpic.twitter.com/ngjtV2C6u2
— Ehtsham Kiani (@ehtshamkiani) August 12, 2025

معرکہ حق جشنِ آزادی کے سلسلے میں نیو کراچی سیکٹر 11 G میں منعقدہ تقریب سے خطاب کے دوران گورنر سندھ نے کہا کہ گورنر ہاؤس کے دروازے عوامی مسائل کے حل کے لیے ہمیشہ کھلے ہیں، شہری امید کی گھنٹی بجا کر اپنا مسئلہ براہِ راست گورنر ہائوس تک پہنچا کر حل کروا سکتے ہیں۔

(جاری ہے)

انہوں نے مزید کہا کہ پاک افواج نے دشمن کو دھول چٹائی، ہم ایک فاتح قوم ہیں، کامیابی کے لیے محنت ضروری ہے اور اتحاد سے ہر مشکل آسان ہو جاتی ہے، کراچی کی ترقی کے لیے سب کو مل کر کام کرنا ہوگا، یہی ہمارا قومی فرض ہے، بڑوں کی عزت اور احترام کو ہمیشہ مقدم رکھیں، یہی ہماری تہذیب اور تربیت ہے۔

قبل ازیں گورنر سندھ کا نیو کراچی آمد پر شہریوں نے پھولوں کی پتیاں نچھاور کرکے ان کا والہانہ استقبال کیا، اس موقع پر فضا "پاکستان زندہ باد" کے نعروں سے گونج اٹھی اور شرکاء کا جوش و خروش قابلِ دید تھا، تقریب میں شاندار آتش بازی کا مظاہرہ بھی کیا گیا جس نے جشنِ آزادی کی رونق کو دوبالا کر دیا، اس موقع پر ایم کیو ایم پاکستان کے سینئر رہنما انیس قائم خانی، ڈاکٹر عبدالباسط ، ریحان اکرام اور دیگر معزز شخصیات بھی موجود تھیں۔