اقلیتی عبادت گاہوں کو غیر قانونی قبضوں سے واگزارکرانے کے لیے مؤثر اقدامات کی ضرورت ہے، صدر

منگل 12 اگست 2025 20:57

اسلام آباد(اُردو پوائنٹ اخبارتازہ ترین - آن لائن۔ 12 اگست2025ء)صدرِ مملکت آصف علی زرداری نے کہا ہے کہ اقلیتی عبادت گاہوں کو غیر قانونی قبضوں سے واگزار کرانے کیلئے مؤثر اقدامات کی ضرورت ہے۔صدر آصف علی زرداری سے وفاقی وزیر برائے مذہبی اٴْمور سردار محمد یوسف کی ایوانِ صدر میں ملاقات ہوئی۔ ملاقات میں اقلیتی حقوق کے تحفظ، مذہبی رواداری کے فروغ اور بین المذاہب ہم آہنگی پر تفصیلی تبادلہ خیال کیا گیا۔

صدر مملکت نے کہا کہ اقلیتی عبادت گاہوں کو غیر قانونی قبضوں سے واگزار کرانے کے لیے مؤثر اقدامات کی ضرورت ہے۔صدر آصف علی زرداری نے وزارتِ مذہبی امور کی اقلیتی برادری کے حقوق کے لیے کاوشوں کو سراہا۔وفاقی وزیر برائے مذہبی امورسردار یوسف نے بتایا کہ اقلیتی فلاحی فنڈ سے 2 ہزار 236 طلبہ کو 6 کروڑ روپے کے وظائف دیے گئے ۔

(جاری ہے)

ایک ہزار 231 ضرورت مند افراد کو مالی امداد فراہم کی گئی ۔

32 اقلیتی عبادت گاہوں کی مرمت اور تزئین کے لیے 4 کروڑ 50 لاکھ روپے مختص کیے گئے ہیں ۔وفاقی وزیر نے بتایا کہ بیساکھی، گورو نانک دیو جی کی سالگرہ، کٹاس راج اور سادھو بیلا جیسے تقریبات کے لیے مفت سہولیات فراہم کی جا رہی ہیں۔نفرت انگیز تقاریر کی روک تھام کے لیے مختلف مذاہب کے علما سے مشاورت کی جاتی ہے ۔اقلیتی برادری کے مسائل کے حل اور اٴْن کے حقوق کے فروغ میں دلچسپی اور تعاون پر صدر آصف علی زرداری کا شکریہ ادا کرتے ہیں ۔