خضدار میں فتنہ الہندوستان کے خلاف سکیورٹی فورسز کا آپریشن، 7 دہشتگرد ہلاک 10 زخمی

دہشتگردوں سے تیار شدہ آی ای ڈیز، ٹرانسمیٹرز، امریکی ساختہ خودکار ہتھیار، گرینڈ، گولیاں اور موٹر سائیکلیں برآمد، بدوکشت کے مرکزی پل پر نصب کی گئی بڑی آئی ای ڈی کو بھی ناکارہ بنا دیا گیا؛ سکیورٹی ذرائع

ساجد علی منگل 30 ستمبر 2025 16:21

خضدار میں فتنہ الہندوستان کے خلاف سکیورٹی فورسز کا آپریشن، 7 دہشتگرد ..

خضدار ( اُردو پوائنٹ اخبارتازہ ترین۔ 30 ستمبر2025ء ) صوبہ بلوچستان میں خضدار کے علاقے زہری میں فتنہ الہندوستان کے خلاف آپریشن کیا جس میں 7 دہشت گرد ہلاک اور 10 زخمی ہو گئے۔ سکیورٹی ذرائع کے مطابق زہری سے ملحقہ پہاڑوں میں فتنہ الہندوستان کی موجودگی اور نقل و حرکت کی خفیہ اطلاعات تھیں، دہشتگردوں نے مقامی لوگوں کو ہراساں کرنے کا عمل بھی جاری رکھا ہوا تھا، بڑھتی ہوئی دہشت گردی کے پیش نظر سکیورٹی فورسز نے خفیہ اطلاع ملنے پر علاقے میں آپریشن کا آغاز کیا، آپریشن میں بڑی تعداد میں گراؤنڈ فورسز اور ہیلی کاپٹرز کا استعمال بھی کیا جا رہا ہے۔

بتایا گیا ہے کہ آپریشن کے نتیجے میں اب تک فتنہ الہندوستان کے 7 دہشتگرد مارے جا چکے ہیں، 10 دہشت گردوں کے زخمی ہونے کی بھی اطلاعات ہیں، ہلاک ہونے والے دہشتگردوں کے قبضے سے تیار شدہ آی ای ڈیز، ٹرانسمیٹرز، امریکی ساختہ خودکار ہتھیار، گرینڈ، گولیاں اور موٹر سائیکلیں بھی برآمد ہوئی ہیں، سکیورٹی فورسز نے فتنہ الہندوستان کی طرف سے بدوکشت کے مرکزی پل پر نصب کی گئی بڑی آئی ای ڈی کو کامیابی سے ناکارہ بنا دیا۔

(جاری ہے)

علاوہ ازیں صوبائی دارالحکومت کوئٹہ میں خود کش دھماکے کے بعد سکیورٹی فورسز کی جوابی کارروائی میں 5 دہشت گرد مارے گئے، اس حوالے سے سکیورٹی ذرائع کا کہنا ہے کہ کوئٹہ میں بھارتی پراکسی فتنہ الہندوستان نے گاڑی سے خودکش حملہ کیا جس میں خودکش حملہ آور کے علاوہ 5 دہشتگرد جہنم واصل ہوگئے، حملہ آور ایف سی کی وردی میں ملبوس تھے جو سب مارے گئے، حملے میں 2 ایف سی جوان زخمی ہیں، بھارت کے ایجنڈے پر کام کرنے والے شرپسند عناصر کے ناپاک عزائم کو ناکام بناتے رہیں گے۔