پنجاب سیف سٹیز اتھارٹی کی کارروائی ،آن لائن ٹیکسی ایپ کے ذریعے شہریوں سے قیمتی سامان لوٹنے والا چار رکنی گروہ گرفتار کر لیا گیا، ترجمان

منگل 12 اگست 2025 22:40

لاہور (اُردو پوائنٹ اخبارتازہ ترین - اے پی پی۔ 12 اگست2025ء) پنجاب سیف سٹیز اتھارٹی کا جدید سرویلنس سسٹم اور بروقت کارروائی کی بدولت آن لائن ٹیکسی ایپ کے ذریعے شہریوں سے قیمتی سامان لوٹنے والا چار رکنی گروہ گرفتار کر لیا گیا۔ ملزمان کے قبضہ سے لاکھوں روپے مالیت کا سامان، گاڑیاں، پستول، لگژری آئٹمز اور دو سو سے زائد سم کارڈ برآمد کر لیے گئے۔

ترجمان پنجاب سیف سٹیز اتھارٹی کے مطابق جیل روڈ لاہور سے رائیڈ ڈرائیور شہری کا لاکھوں مالیت کا سامان لے کر فرار ہو گیا۔ متاثرہ شہری نے فورا 15 ایمرجنسی ہیلپ لائن پر کال کر کے پولیس سے مدد طلب کی۔ کال موصول ہوتے ہی پنجاب سیف سٹیز اتھارٹی کے ورچوئل پٹرولنگ آفیسر نے جدید کیمروں اور اے آئی بیسڈ ٹیکنالوجی کی مدد سے ملزمان کی گاڑی کا مکمل روٹ ٹریس کر کے لوکیشن پولیس کو فراہم کر دی۔

(جاری ہے)

سیف سٹی کی نشاندہی پر پولیس نے فوری کارروائی کرتے ہوئے چاروں ملزمان کو گرفتار کر لیا۔ تحقیقات کے دوران انکشاف ہوا کہ یہ گروہ جعلی ڈرائیونگ ایپس کے ذریعے شہریوں سے فراڈ اور دھوکہ دہی میں ملوث تھا۔ ملزمان کے قبضے سے لاکھوں روپے مالیت کا قیمتی سامان، گاڑیاں، پستول، لگژری آئٹمز اور 200 سے زائد سم کارڈ برآمد کیے گئے۔ شہری آن لائن رائیڈ بک کرتے وقت صرف مستند اور قابلِ اعتماد ذرائع استعمال کریں تاکہ کسی بھی ممکنہ فراڈ سے محفوظ رہا جا سکے۔