پی ٹی آئی کیخلاف فیصلہ عدالتوں نے دیا تو ریلیف بھی وہیں سے ملے گا،اعظم نذیرتارڑ

مقدمات میں آئین و قانون کے تحت فیصلے ہوتے ، جمشید دستی کو فوری ریلیف ملا ،وزیرقانون

منگل 12 اگست 2025 20:05

اسلام آباد(اُردو پوائنٹ اخبارتازہ ترین - این این آئی۔ 12 اگست2025ء)وفاقی وزیر قانون اعظم نذیر تارڑ نے کہا ہے کہ پی ٹی آئی کے خلاف فیصلہ عدالتوں نے دیا ہے تو ریلیف بھی عدالتوں سے ملے گا، ماضی میں ہمارے قائدین کو بھی سزائیں ہوئیں جنہیں عدالتوں سے ریلیف ملا۔ منگل کو سینیٹ کے اجلاس میں اظہار خیال کرتے ہوئے اعظم نذیر تارڑ نے کہا کہ ایوان میں کسی کی دل آزاری نہیں ہونی چاہئے، سب کو اپنا اپنا نقطہ نظر پیش کرنا چاہئے، اختلاف رائے اور مباحثہ جمہوریت کا حسن ہے، سزا جب تک معطل یا ختم نہیں ہوتی اس وقت تک وہ نافذ رہتی ہے اور اس کے بعد نااہلی ہو جاتی ہے، سزا صرف عدالتیں ختم کر سکتی ہیں۔

انہوں نے کہا کہ الیکشن کمیشن نے نااہلی کے فیصلے کی وجوہات تفصیل سے بیان کی ہیں، الیکشن کمیشن کا فیصلہ عدالتوں میں چیلنج کیا جا سکتا ہے۔

(جاری ہے)

وفاقی وزیر نے کہا کہ حنیف عباسی کے خلاف منشیات کا کیس بنا کر سزا دی گئی، عرفان صدیقی کو کس جرم میں اٹھایا گیا۔ انہوں نے کہا کہ مسلم لیگ ن کے قائد نواز شریف کو بھی سزا دی گئی اور نااہل کیا گیا، انہوں نے عدالتوں میں سرینڈر کیا، اس کے علاوہ بھی ہمارے قائدین کو سزا دی گئی، انہیں عدالتوں سے ریلیف ملا۔ انہوں نے کہا کہ ہمیں مل کر بیٹھنا چاہئے اور بات کرنی چاہئے۔انہوںنے کہاکہ9مئی کو جلائو گھیرائوکیا گیا، شہدا کے مجسمے جلائے گئے، مقدمات میں آئین و قانون کے تحت فیصلے ہوتے ہیں اور ریلیف ملتا ہے، جمشید دستی کو فوری ریلیف ملا ہے۔