Live Updates

عمران خان کی بہنوں کو رہا کر دیا گیا

تحریک انصاف کے رہنماوں اور کارکنوں نے چکری میں علیمہ خان اور نورین خان کا استقبال کیا

محمد علی منگل 12 اگست 2025 23:31

راولپنڈی (اُردو پوائنٹ اخبارتازہ ترین۔ 12 اگست2025ء) عمران خان کی بہنوں کو رہا کر دیا گیا، تحریک انصاف کے رہنماوں اور کارکنوں نے چکری میں علیمہ خان اور نورین خان کا استقبال کیا۔ پنجاب پولیس نے بانی تحریک انصاف کی 2 بہنوں کو اڈیالہ جیل کے قریب سے حراست میں لیا تھا۔ میڈیا رپورٹس کے مطابق پنجاب پولیس نے تحریک انصاف کے متعدد کارکنان کو بھی حراست میں لیا۔

راولپنڈی پولیس علیمہ خان اور نورین خان کو حراست میں لے کر چکری انٹرچینج کی جانب روانہ ہوئی۔ پولیس کی اس کاروائی کے بعد تحریک انصاف کے رہنما اور کارکنان چکری موٹروے انٹرچینج کے قریب پہنچ گئے۔ بعد ازاں پولیس نے چکری موٹروے اٹرچینج پہنچ کر علیمہ خان اور نورین خان کو رہا کر دیا، جس کے بعد پی ٹی آئی کارکنان اور رہنما عمران خان کی بہنوں کو لے کر اسلام آباد کیلئے روانہ ہو گئے۔

(جاری ہے)

اس سے قبل بانی پی ٹی آئی کے ہمشیرہ علیمہ خانم نے اڈیالہ کے قریب سلمان اکرم راجا و دیگر وکلا کے ساتھ دھرنا دے دیا تھا۔ ملاقات کا دن ہونے کے باوجود عمران خان سے ان کی بہنوں کی ملاقات نہیں کروائی گئی تھی۔ عمران خان کی بہن علیمہ خانم کا کہنا تھا کہ جب تک بھائی سے ملاقات نہیں کروائی جاتی یہاں سے نہیں جائیں گے۔ انہوں نے کہا کہ عمران خان سے ملاقات کے لیے آئے تھے، ہمیں جیل سے 2 کلو میٹر دور روکا گیا، سلمان اکرم، ظہیر عباس اور نعیم پنجوتھا سمیت سب کو روکا گیا ہے۔

علیمہ خانم نے کہا کہ بانی سے ملاقات نہیں کروائی جارہی، ہم جیل کے باہر بیٹھ جائیں گے۔ واضح رہے کہ اس سے قبل بھی ایک مرتبہ عمران خان کی بہنوں کو اپنے بھائی سے ملاقات نہ کروانے کے بعد دھرنا دینے پر گرفتار کر کے رات کے اندھیرے میں چکری کے قریب اتار دیا گیا تھا۔ دوسری جانب تحریک انصاف نے عمران خان سے ملاقات نہ کروانے پر قومی اسمبلی میں بھی شدید احتجاج کیا۔ قومی اسمبلی اجلاس کے دوران اسد قیصر نے مطالبہ کیا کہ عمران خان سے ملاقات کروائی جائے۔ اگر بانی تحریک انصاف سے ملاقات نہ کروائی گئی تو کل بھی اجلاس کا بائیکاٹ کریں گے۔