پی ٹی آئی رہنما اعجازچوہدری کی جیل میں طبیعت بگڑ گئی،ہسپتال منتقل

بدھ 13 اگست 2025 16:38

لاہور (اُردو پوائنٹ اخبارتازہ ترین - این این آئی۔ 13 اگست2025ء) پاکستان تحریک انصاف کے رہنما اعجاز چوہدری کی جیل میں طبیعت بگڑ جانے پر انہیں فوری طور پر ہسپتال منتقل کردیا گیا ۔وکیل رانا مدثر ایڈووکیٹ کے مطابق اعجاز چوہدری کے گردوں میں انفیکشن ہے جس کی وجہ سے انہیں شدید تکلیف کا سامنا ہے جبکہ ان کے پتے میں بھی سات پتھریاں پائی گئی ہیں۔جیل حکام نے اعجاز چوہدری کو تکلیف کے باعث فوری طور پر لاہور کے پاکستان کڈنی اینڈ لیور انسٹی ٹیوٹ (پی کے ایل آئی)منتقل کیا۔

(جاری ہے)

وکیل نے بتایا کہ اعجاز چوہدری کا وزن اب تک 22کلوگرام کم ہو چکا ہے اور ہسپتال میں ان کے مختلف میڈیکل ٹیسٹ جاری ہیں۔خیال رہے کہ پی ٹی آئی رہنما اعجاز چوہدری نو مئی کے مقدمات میں کوٹ لکھپت جیل میں قید ہیں۔22جولائی کو لاہور کی انسدادِ دہشت گردی عدالت نے شیرپائو پل جلائو گھیرائو کیس میں پاکستان تحریک انصاف کے رہنمائوں ڈاکٹر یاسمین راشد، میاں محمود الرشید، اعجاز چوہدری اور سرفراز چیمہ کو 10،10سال قید کی سزا سنادی تھی جبکہ شاہ محمود قریشی و دیگر ملزمان کو بری کر دیا تھا۔