افواج اور عوام کا اٹوٹ رشتہ اجتماعی قوت کا بنیادی ستون ہے، عسکری قیادت کا یومِ آزادی پر پیغام

یوم آزادی کے اس مبارک موقع پر ہم عہد کرتے ہیں کہ امن، ترقی اور یکجہتی کے لیے اپنی کاوشیں جاری رکھیں گے اور ترقی یافتہ پاکستان کے خواب کو حقیقت میں بدلیں گے؛ مسلح افواج کے سربراہان کا بیان

ساجد علی جمعرات 14 اگست 2025 11:09

افواج اور عوام کا اٹوٹ رشتہ اجتماعی قوت کا بنیادی ستون ہے، عسکری قیادت ..

راولپنڈی ( اُردو پوائنٹ اخبارتازہ ترین۔ 14 اگست 2025ء ) چیف آف آرمی سٹاف فیلڈ مارشل سید عاصم منیر، چیئرمین جوائنٹ چیفس آف سٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ائیر اسٹاف ائیر چیف مارشل ظہیر احمد بابر سدھو نے مسلح افواج پاکستان کی جانب سے پوری قوم کو پاکستان کے 78ویں یوم آزادی کی پرمسرت اور تاریخی موقع پر دلی مبارکباد دی ہے۔

تفصیلات کے مطابق اپنے پیغام میں عسکری قیادت نے کہا کہ قائداعظم محمد علی جناح کی ولولہ انگیز قیادت میں ہمارے بزرگوں کی لازوال قربانیاں، جرات اور غیر متزلزل عزم و یقین نے آزادی کی راہ ہموار کی، یہ قربانیاں آج بھی ہمارے لیے رہنمائی کا روشن مینار ہیں، مسلح افواج ان تمام رہنماؤں، مدبرین اور جانباز سپاہیوں کو بھی گہری عقیدت اور شکرگزاری کے ساتھ یاد کرتی ہے جنہوں نے اس ملک کی بنیاد رکھنے میں اپنا کردار ادا کیا۔

(جاری ہے)

عسکری قیادت نے اس عزم کو دہرایا کہ بطور قومی سلامتی کے محافظ، مسلح افواج پاکستان کی خودمختاری اور علاقائی سالمیت کے تحفظ، آئین کی پاسداری اور ان تمام اقدار کی حفاظت کے لیے پرعزم ہیں جو ہماری قومی شناخت کی اساس ہیں، مسلح افواج اور عوام کا اٹوٹ رشتہ ہی ہماری اجتماعی قوت کا بنیادی ستون ہے، یوم آزادی کے اس مبارک موقع پر ہم عہد کرتے ہیں کہ امن، ترقی اور یکجہتی کے لیے اپنی کاوشیں جاری رکھیں گے اور ایمان، اتحاد اور قربانی کے جذبے سے ایک مضبوط، خوشحال اور ترقی یافتہ پاکستان کے خواب کو حقیقت میں بدلیں گے۔

خیال رہے کہ ملک بھر میں 78 واں جشن آزادی آج ملی جوش و جذبے کیساتھ منایا جا رہا ہے، رواں سال کو معرکہ حق کی عظیم فتح سے منسوب کیا گیا ہے، دن کے آغاز پر وفاقی دارالحکومت اسلام آباد میں 31 اور صوبائی دارالحکومتوں میں 21، 21 توپوں کی سلامی دی گئی، فضا نعرہ تکبیر اللہ اکبر کے نعروں سے گونج اٹھی، مساجد میں نماز فجر کے بعد ملکی ترقی، یکجہتی، امن اور خوشحالی کیلئے خصوصی دعائیں کی گئیں، جشن آزادی پر شہر شہر، گلی گلی سبز ہلالی پرچم کے رنگوں سے رنگ گئے، جبکہ سرکاری و رہائشی عمارتوں، شاہراہوں، سڑکوں اور مختلف مقامات کو برقی قمقموں سے سجایا گیا ہے۔